- Publika iha: 15 Janeiro 2015
Provedor dos Direitus Humanus e Justisa (PDHJ) Silverio Baptista Pinto apoia inisiativa Komando Jeral Polisia Nasional Timor-Leste fo orden ba nia membrus hotu atu halo teste ba virus HIV/SIDA nudar obrigatoriu.
Tuir Provedor PDHJ, desizaun ida ne’e diak tanba atu fo seguransa ne’ebe diak ba nasaun no povu presiza pesoal seguransa ne’ebe saudavel intermus de fisikamente no psikologia.
“Hau la hatete ida ne’e violasaun direitus humanus, maibe forsa sira tenke pronto servi povu no nasaun ida ne’e kualker oras, tanba ne’e atu sai servidor ne’ebe diak saude tenke diak,” Provedor Pinto hateten,iha Dili.
Maibe nia sei la konkorda bainhira halo teste detekta membru balun hetan virus HIV no komandu halo demisaun ba sira, tanba uluk sira tama forsa iha saude ne’ebe diak.
“Ita halo demisaun ba sira tanba moras HIV, ne’e labeleno ita kontra maka’as ida ne’e,” Provedor Pinto hateten.
Tanba tuir dadus ne’ebe iha, nia dehan, membru polisia balun mos detekta ona positive hetan virus HIV, tanba ne’e importante atu halo teste hodi nune’e positive bele submete ba iha tratamentu.
Antes ne’e Komandu Jeral Polisia Nasional Timor –Leste (KomJer-PNTL), Komisariu Longuinhos Monteiro, hateten PNTL halo parseria ho Komisaun Nasional Kombate SIDA iha Timor –Leste (KNKS-TL) hodi halo sosializasaun ba membru polisia sira no halo teste obrigatoriu ba membru sira.
“Ne’e la’os ona voluntario, maibe obrigatoriumente tenke iha korajen atu halo teste no tinan ida dala ida, nune’e bele konfirma ita livre husi virus HIV,” Komisariu Monteiro hateten.
Entretantu reprejentante World Health Orgabization (WHO) iha Timor –Leste, doutor Jorge Mario Luna, hateten halo teste ba HIV tenke ho voluntario no liu husi prosesu pre counseling no post counseling hafoin halo teste.
“Lolos ne’e la’os obrigatoriu, maibe sidadaun hotu iha ne’ebe deit tenke ho voluntariu no liu husi pre counseling no post counseling hodi simu rezultadu ne’ebe iha,”doutor Luna hateten.
Kona ba desizaun Komando Jeral PNTL ne’ebe obriga nia Polisia sira atu halo teste virus HIV, nia parte lakohi fo komentariu tanba nia rasik laiha konesementu kona ba desizaun ida ne’e.
“Iha ne’ebe deit teste HIV ne’e voluntariomente husi ema ida-idak."