Inu Nasional komesa kanta iha eskola sira

Hafoin Konselhu Ministru fo sai desizaun atu implementa kanta Inu Nasional iha eskola hotu, oras ne’e dadaun eskola sira komesa kanta no dada bandeira nasional ona iha kada Segunda-feira, antes tama ba eskola.

“Estudante sira iha eskola sira hotu kanta ona Inu Nasional molok tama ba eskola laran,” hateten Ministru Edukasaun Joao Cancio Freitas, semana kotuk (01/02) bainhira lansa setimo no desimo ano eskolaridade nian iha Eskola Bazika Sentral Farol, Dili.

Tuir Ministro Freitas katak, intensaun husi implementa kanta Inu Nasional iha eskola sira, tanba Inu Nasional hanesan identidade nudar nasaun ka pais.

“Inu Nasional representa simbolu Nasional, iha Konstitusaun hateten obrigatoriamente para alende hasa’e Bandeira Nasional mos tenke kanta Inu Nasional, antes sira tama bas ala de aula, depois mak sira reza,” Ministru Freitas afirma.

Ministru reafirma, obrigatoriumente estudante sira tenke hatene kanta Inu Nasional “ Ami mos distribui ona kaset CD Inu Nasional ba eskola hotu, para atu hanorin kanta Inu Nasional estudante tuir versaun ne’ebe lolos, tanba iha fatin barak ami rona labarik barak kanta la tuir versaun ne’ebe los,” nia katak.

Iha parte seluk Estudante Julito da Silva hateten,  lor-loron molok atu tama ba escola sira reza uluk reza hotu sira kanta Inu Nasional mak tama ba sala de aula.

“Sim, nudar estudante hau tenke hatene kanta Inu Nasional ida tanba Inu Nasional mak sai hanesan ita nia identidade nasaun nian,” hateten Estudante da Silva.

Tuir nia, nudar Timoroan no nudar estudante ida tenki hatene kanta ida ne’e, atu nune’e bele fo honra ba heroi sira hotu ne’ebe mate iha funu laran tan deit hakarak Timoroan atu hetan nia independensia.