- Publika iha: 22 Julho 2014
Membru Parlamentu Nasional, sujere ba Ministeriu Edukasaun atu halo uma dinas ba profesor sira ne'ebe hela do'ok husi eskola (liu-liu eskola iha area rural), nune'e bele fasilita sira hala’o prosesu aprendizajen iha eskola ho efetivu liu tan.
"Uma ne’e mos difikulta ba prosesu ensinu iha baze, tanba sira balun hela iha sidade, dadersan ho transporte ba iha eskola sira hodi hanorin," Deputadu Paulino Monteiro, hateten, iha Parlamentu Nasional.
Deputadu husi bankada Partidu Demokratiku (PD) ne'e, hateten durante ne'e profesor sira ne'ebe hela do'ok husi eskola ,dadersan viajen ba mai ho distansia ne'ebe mak do'ok.
Tanba ne'e sujere ba Ministeriu Edukasaun oinsa tau atensaun ba kestaun ne'e.
Entretantu Ministru Edukasaun (ME), Bendito Freitas, nia parte simu sujestaun ne'e, tanba profesor sira ho nia didikasaun maka'as.
"Interese nasional mak numeru um, ne'e importante tebes-tebes," Ministru Freitas hateten.
Tuir nia, atu garante kualidade edukasaun, professor sira mos tenke apoia maka’as.