- Publika iha: 31 Julho 2014
Estudantes Universidade Oriental Timor Lorosa’e (UNITAL) loron ida tomak hapara prosesu aprendizajen no focus hodi rona sosializasaun informasaun no edukasuan prevensaun ba moras HIV/SIDA ne’ebe organiza husi Comisaun Nasional ba Kombate HIV/SIDA, iha sira nia kampus.
Reitor Interino UNITAL, Ricardo da Costa, hateten estudante sira mak risku bo’ot ba iha moras ida ne’e, tanba sira deside laiha aulas no estudantes hotu tenke focus rona informasaun kona ba moras ne’e.
Nia dehan, estudantes UNITAL maioria husi area rural ne’ebe laiha konesementu klean ba moras ida ne’e.
“Loke imi nia matan no tilun, rona informasaun hirak ne’ebe ita nia maluk sira hato’o no tau iha ita neon, tanba moras ida ne’e fo impaktu ladiak ba ita nia futuru, nasaun no familia,” Reitor Interino Ribeiro hateten, iha kampus UNITAL Becora, Dili.
Iha parte seluk, Julia Noronha, hateten informasaun edukasuan prevensaun ba moras HIV/SIDA ne’e importante ba sira, nune’e sira bele iha konesementu no bele prevene an husi moras ne’e.
“Informasaun hirak ne’e ami sei fahe ba maluk sira ne’ebe seidauk iha konesementu nune’e bele prevene an husi moras at ne’e,” nia hateten.
Entretantu Sekretario Jeral Comisaun Nasional Kombate HIV/SIDA iha Timor –Leste (CNCS-TL), Daniel Marçal, hateten kampanha ida ne’e kontinua la’o sai tama eskola husi ensino sekundario to’o universidade sira.
“Ami koordena ho diretor no reitor sira atu fasilita sira nia estudantes atu simu informasaun baziku kona prevensaun HIV/SIDA hodi asegura sira nia future, tanba joven sira mak risku tebes ba transmisaun HIV/SIDA,” Marçal hateten.
Iha tempu badak, nia dehan, CNCS Timor –Leste ho Comisaun Nasional Kombate HIV/SIDA Indonezia sei halo kampanha prevensaun moras HIV/SIDA iha area fronteiras Oe-Cusse, Bobonaro no Covalima, tanba konsidera area risku ba transmisaun virus HIV.