- Publika iha: 31 Julho 2014
Hafoin tuir kursu kona ba hotelaria nian iha East Timor Development Agency (ETDA) durante fulan rua nia laran, estudantes nain 25 hahu tama ona pratika asesmentu ba faze avaliasaun nian.
Koordenadora kursu Hotelaria ETDA, Juvita Belo, hateten iha faze assementu ne’e Master Chef hakarak haree estudante sira nia implementasaun material ne’ebe durante ne’e sira hetan.
Iha faze asesmentu avalisaun ne’e, nia dehan, Master Chef konvida kliente lubuk ida hodi mai koko estudante sira nia hahan inklui atendementu sira seluk.
“Direitamente hasoru ho kliente, oinsa sira serve, simu bainaka ho diak, no oinsa sira nia hijenia pesoal,” Koordenadora Belo hateten.
Hafoin kliente sira koko sira hahan, nia dehan, sei fo komentaria liu husi surat tahan ne’ebe mestri sira prepara iha kliente sira nia meja leten.
Nia informa, iha profesores nain lima mak hanorin estudante sira ne’e, idak –idak ho nia material ketak-ketak, no prefesores hirak ne’e timor oan.
“Profesores seguransa aihan nian, kona ba serve bainaka, profesores hijeniku ba aihan, house keeping nian no profesores seluk hanorin tein nian,” Belo esplika.
Estudante hirak ne’e, nia dehan, wainhira remata sira nia kursu, ETDA sei transfere ba industria ou hotel ne’ebe presiza sira.
Entretantu Koordenador Australian Volunteers Internasional, ne’ebe hanesan mos kliente, Cathy Molnar, hateten estudantes ne’ebe kursu iha ne’e kualidade tebes, no sira iha skill ne’ebe pronto atu uja.
“Restorante barak mak nia servidor laiha skill, maibe sira iha ne’e nia nivel diak liu, sira nia servi ba kliente kapaas, sopan, tein hahan diak los,” Molnar gava.
Iha fatin hanesan estudante Melina Soares, hateten sira aprende buat barak liu husi kursu iha ETDA ne’e.
“Hau aprende buat foun, hanesan hudi ita bele halo sai cake no senhora mos ita bele halo sai cake,” nia dehan.