- Publika iha: 26 Agosto 2014
Profesores iha eskola Ensino Baziku Sentru Central sub-distritu Lospalos, preokupa tebes kona ba livru lian Ingles nian inklui biblioteka, tanba durante ne’e sira laiha livru kona ba lian ne’e.
Profesor Nuno Ano Maria Isabela Savio, hateten alende livrus sira mos falta meja no kadeira iha sira nia eskola, no estudantes balun tur deit iha semente tuir prosesu aprendizajen.
Nia dehan, livru ne’ebe mak Ministeriu Edukasaun lori mai durante ne’e, la tuir kurikulum ne’ebe mak sira fo, iha livru ne’e hakerek oin seluk fali.
“Ami hasoru problema barak, hanesan livru no sala de aulas inklui mos biblioteka, durante ne’e ami laiha,” nia hateten.
Iha fatin hanesan Diretor da Eskola eskola Ensino Baziku Sentral Centru Lospalos, Marcos da Costa hateten, atu kria edukasuan ne’ebe iha kualidade diak, Ministeriu Edukasuan mos tenke kria kondisaun ne’ebe diak ba professor sira.
“Tenke aumenta salariu profesores sira nian, hanesan eskola referensia, atu nune’e profesores sira iha vontade diak hanorin alunus sira sai diak no kualidade,” Diretor Marcos da Costa hateten.
Alende ne’e, nia mos preokupa kona ba sira nia eskola ne’ebe sei falta salas de aulas, tanba ida ne’e fo impaktu ba estudante sira.
“Durante ne’e ami iha sala rua mak at, wainhira iha tempu udan ami labele halo prosesu de aprendizajen, tanba bee tama,” Diretor Marcos hateten.
Tuir nia, fasilidades eskola ne’e importante tebes atu fasilita prosesu aprendizajen diak liu tan, maibe kuandu laiha fasilidades, susar atu atinji kualidade ne’ebe diak.