- Publika iha: 12 Setembro 2014
Estudantes sira iha capital Dili ejiji ba Ministeriu Edukasaun (ME) atu prepara bus eskola ba estudante sira, nune’e labele tarde tama eskola.
Estudante husi Eskola Ensino Sekundaria Nobel da Paz, Avelino da Costa, hateten durante ne’e sira desaraska bainhira hein kareta ba eskola, tanba kondutor balun lakohi tula sira.
“Dalaruma ami obriga sa’e mikrolet maske tara an, maibe Polisia hatun ami iha dalan, entaun ida ne’e halo ami tama eskola tarde,” estudante da Costa preokupa.
Tanba ne’e, nia husu, ba Ministeriu Edukasaun atu hola transporte publiku ida ba estudante sekundaria no pre- sekundaria sira, nune’e ba eskola labele tama tarde.
“Ami sente triste, tanba ami ba eskola ne’e sempre tama tarde, dala ruma ami to’o material primeiru hotu tiha,” nia kestiona.
Entretantu membru Komisaun F (edukasuan, saude, kultura, veteranus no igualdade jeneru), Deputada Ilda Maria da Concencao, hakarak ga lakohi estudante sira ba eskola tenke tuir oras ne’ebe determina ona husi eskolas.
Deputada ne’e mos konkorda ho operasaun Polisia Nasional Tranzito (POLTRANS) ne’ebe hatun estudantes tara an, tanba ne’e perigu ba sira nia vida.
“Agora ne’e labarik sira barak mak nonton bola, sira hader tarde no mai eskola tara an iha kareta, sira monu fo sala ba see,ita tenke tau polisia ne’e para hodi haree,” nia hateten.
Tanba ne’e nia husu ba estudante sira hotu, atu labele tara an bainhira sa’e kareta ba eskola, tenke hanoin inan aman nia kolen.
Iha parte seluk, Komandante Operasional Superintendente Armando Monteiro, hateten iha lei numeru 1 pormulga ona iha tinan 2006, katak polisia tenke kontrola komunidade sira, liu-liu ba estudante sira ne’ebe mak sa’e kareta tara an deit.
“Ami halo tiha ona sosializasaun kona ba lei ba sira no estudante sira hatene ona maibe finji la hatene,” Komandante Monteiro hateten.
Tuir nia, estudante sira tara an iha mikrolet ne’e fo ameasas bo’ot ba sira nia vida.