Quinta, Março 28, 2024
Total visitors: 766366

Ministeriu Edukasaun (ME) sei halo rehabilitasaun ba eskolas 800 iha rai laran ne’ebe identifika at no Orsamentu Jeral Estadu  (OJE) 2015 nian fo prioridade ba ida ne’e, tanba eskola hirak ne’e kondisaun at, liu-liu iha are remotas.

Diretor Jeral do Servisos Corpotivos ME, Antoninho Pires, hateten uma eskola 800 ne’e prezisa halo rehabilitasaun inklui kompleta fasilidades eskola nian.

“Ami identifika ona eskola ne’ebe bele hetan rehabilitasaun no eskola ne’ebe mak bele hetan konstrusaun, total hamutuk 800 mak prezisa hadia,” Diretor Jeral Pires hateten, iha Vilaverde, Dili.

Iha tinan kotuk (2014), nia dehan, orsamentu ba ME iha $25 milions hodi halo meja ho kadeiras hamutuk rihun atus ida (100.000) no meja kadeiras hirak ne’e sei distribui uluk eskolas ne’ebe laiha meja kadeiras durante ne’e.

Iha parte seluk Jestor Programa Timor-Leste Coalition of Education (TLCE), Matias dos Santos, konkorda ho planu ministeriu nian hodi hadia kondisaun eskolas ne’ebe at inklui kompleta meja kadeiras.

“Ministeriu iha komitmentu ida atu hadia no halo rehabilitasaun uma eskola sira ne’ebe estragus husi tempu krizi Timor ukun aan ho krizi tinan 2006 nian,” nia hateten.

Iha fatin seluk membru Komisaun F (saude, edukasaun, kultura, veteranus no igualdade jeneru), Deputadu Eladio Faculto, hateten eskola barak falta fasilidade hanesan konstrusaun uma eskola, meja kadeiras, inklui mos eletrisidade eskola hotu-hotu tenke kompletu.

Se tinan ida ne’e mak ministeriu prioridade ba konstrusau ba uma eskola, nia dehan, ne’e diak liu, tanba eskola iha area remotas ne’e barak ho kondisaun ne’ebe la sufsiente estudante atu hala’o apredizajen.

“Hau preokupa governu nia politika, planu ho programas, sira tenke hatene saida mak planu no saida mak programas, tanba governu ne’e importante mak iha ona planu programa, maibe laiha planu programa lala’o,” nia dehan.