Sexta, Março 29, 2024
Total visitors: 766366

Koordenador Programa Edukasaun CARE Internasional, Shoaib Danish, sujere ba profesores iha teritorio tomak atu dezenvolve atividade extrakulikular iha eskola, nune’e bele atrai alunus ativa no la husik eskola.

 

Nia dehan, programa pilotu prevensaun husik eskola ne’ebe sira implementa iha eskoal 97 husi munisipio Bobonaro, Ermera, Liquisa, Mantutu no Viqueque, hatudu katak atividade extrakurikuler importante tebes atu motiva labarik sira ba nafatin eskola. 

“Atividade sira ne’e bele inisiativa labarik sira mai eskola, halo labarik haree eskola hanesan fatin amigavel, haksolok no automatikamente dudu labarik sira ba eskola nafatin,” Koordenador Danish hateten, bainhira aprezenta rezultado final peskiza Programa Pilotu Prevensaun Husik Eskola, iha Garden Beach Hotel, Dili. 

Nia hatutan, liu husi atividade extrakurikuler (kanta, jogos, dezenho no seluk tan) bele dezenvolve mos labarik sira nia kapasidade no abilidade atu partisipa ativa iha prosesu aprendizajen lor-loron.

Alende ne’e, nia dehan, meus seluk ne’ebe importante tebes ba professor sira halo hodi prevene labarik sira husik eskola, mak avizu no responde sedu inklui mos kontrolu prezensa alunus lor-loron. 

Kona ba atividade extrakurikuler ne’e, Diretor Edukasaun munisipio Viqueqeu, Emilio Amaral, hateten fo ona formasaun ba sira nia profesores kona ba metodologia hanorin ne’ebe bele atrai labarik sira tama eskola nafatin. 

Maibe nia dehan, depende mos ba profesores sira nia metodu hanorin iha aula lor-loron. “Profesores tenke kreativu atu hanorin labarik sira, sela’e susar,” nia hateten. 

Entretantu Diretor Ensino Baziku Ministerio Edukasaun, Alfredo de Araujo, apresia ho programa ne’ebe Care Internasional implementa ne’e iha duni progresu signifikante, tanba iha eskola intervensaun numeru labarik husik eskola redus. 

“Programa ida ne’e hetan susesu, tanba liu husi atividade extrakurikuler, avizu sedu, aprosimasaun ba inan aman alunus risku husik eskola (falta beibeik) konsege redus numeru alunus husik eskola,” nia hateten. 

Nia hatutan, Ministerio Edukasaun iha komitmentu atu kontinua programa ne’e iha munisipio seluk ho orsamentu estado nian, tanba programa ne’e importante tebes kontribui ba redus numeru husik eskola.