- Publika iha: 09 Fevereiro 2016
Reprezentante povu iha Parlamentu Nasional, Deputadu Virgilio da Costa Hornai hateten fundasaun edukasaun iha Timor –Leste sei namlele, tanba menus profesores iha disiplina siensia exata.
Nia dehan, bolseirus Timor oan barak ba iha rai liur la konsege remata sira nia kursu, universidade haruka fila, tanba la domina siensia baziku.
“Ita nia formasaun inisio husi TK to’o iha ensino sekundario ne’e seidauk diak, entaun susar ba ita atu kompete iha sistema edukasaun husi nasaun Eropa sira,” nia hateten, iha Parlamentu Nasional.
Nia hateten, ne’e problema seriu ne’ebe Timor –Leste hasoru hela no buka meus atu hadia hodi eleva kualidade ensino sira nian iha rai laran.
“Ita buka hadia ita nia kondisaun no kualidade profesores sira, to’o tempu sei lori ita atu kompete iha nasaun seluk,” nia hateten.
Iha parte seluk, Diretor Jeral Ministerio Edukasaun, Antoninho Pires, rekonese katak fundasaun edukasaun iha Timor –Leste sei iha problemas.
“Ita fo formasaun ba profesores atu domina siensia, liu –liu iha are matematika, kimika, fisika ho materia exata sira, tanba ita seiduak iha faze ida forte ba ida ne’e,” DJ Pires hateten.
Nia hatutan, tinan kotuk (2015) bolseirus nain lima ne’ebe hasai estudu iha Portugal, universidade haruka fila, tanba sira labele.
Nia dehan, bolseirus sira ne’e fila la’os tanba problema lingua, maibe dominasaun ba siensia mak menus.
“Domina siensia mak seidauk, tanba ne’e seidauk bele tama iha nivel international,” nia hateten.