- Publika iha: 13 Abril 2016
Ministerio Edukasaun (ME) hamutuk ho Ministerio Saude (MS) estabelese komite ida hodi implementa Programa Saude Eskolar (PSE) iha munisipio Dili.
Diretor Nasional Asaun Sosial Eskolar, Belchior R. A. Barros, hateten papel komite ida ne’e importante tebes atu implementa programas no halo avaliasaun ba atividades ne’ebe relasiona ho saude iha eskola.
“Komite ida ne’e sei fo treinamentu ba profesores sira atu kontrolu labarik sira labele fuma no soe foer arbiru iha koridor eskola nian inklui kampanha promosaun saude iha eskolas,” hateten Diretor Barros, iha salaun enkontru Coreios, Dili.
Nia dehan, komite ida ne’e kompostu husi reprezentante Ministerio Saude, Ministerio Edukasaun, Ministerio Agrikultura e Peskas, Ministerio Obras Publikas e Transporte (Servisu Agua e Saneamentu) inklui fasilidade saude sira.
Kona ba munisipio Dili sai pilotu ba projetu ida ne’e, nia dehan iha munisipio Dili mak eskolas iha kondisaun (bee no saneamentu) atu implementa programa ida ne’e, maibe sei ba mos munisipio seluk.
Nia informa, sira identifika ona sentru ensino baziku 22 iha munisipio Dili atu sai alvu ba projetu pilotu ida ne’e durante tinan ida.
Iha tinan 2015, nia dehan, Ministerio Edukasaun no MS estabelese ona programa ne’e iha eskola balun maibe faila, tanba falta koordenasaun entre linha ministerial.
Programa ne’e, nia hateten, hetan supporta husi organizasaun SHARE husi Japaun durante tinan rua (2016-2017).
Iha parte seluk, Pesoal Promosaun Saude MS, Rita Maria Soares, hateten estabelesementu komite ida ne’e importante tebes atu atividade hotu ne’ebe la’o iha escola ne’e integradu no organizadu.
“Fahe informasaun kona ba moras hirak ne’ebe kauza husi vector (dengue, malaria, Zika) no seluk ba labarik sira inklui halo screening oral, matan iha eskolas,” nia hateten.