Nasaun 5 mak fo formasaun lingua ba dosenten no estudante sira iha UNTL

Oras ne’e dadaun iha nasaun lima mak fo formasaun ba lingua Inglesh no Portugues ba iha Dosente no Estudante sira iha Universidade Nasional Timor Lorosa’e (UNTL), liu-liu iha Fakuldade Edukasaun, Departementu Lian Inglesh no Portugues.

Nasaun lima ne’e mak hanesan, Brazil, Portugal, Nova Zelandia , Australia no Amerika hodi fo kapasitasaun formasaun lian Inglesh ho Portugues ba Dosente no estudante sira, atu nune’e sir abele hatene ho diak liu tan.
“Agora dadauk ami iha Sentru Formasaun Lingua Inglesh (ELC), suporta husi Australia, agora sira forma hela prosesu oinsa para atu halo sentru lingua ne’e sai hanesan modelu diak liu tan iha Timor-Leste,” hateten Administrador UNTL, Mateus Fernandes, (24/05), iha Liseu Dili.
Tuir nia,maske lian ofisial mak lian Tetun no Portugues, maibe presiza mos lian Inglesh tanba ne’e lian internasional.

Entertantu Membru Komisaun F Parlamentar, Deputada Tereza de Carvalho dehan, inisiativa UNTL hodi loke ELC ne’e diak, nune’e dosente no estudante sira  bele aprende lian sira ne’e ho diak liu tan.
“Aban bainrua Timor oan eskola hotu depois hakarak ba aumenta tan estudus ne’e la’os mai husi paises Lingua Portugueses deit, mai mos husi lingua Inglesh,” Deputada de Carvalho dehan.

Nia hateten lingua Inglesh ne’e primeiru lingua do mundu, enkuantu lingua Portugues lingua CPLP nian.
“Ita ba hanesan seminar ka programa internasional iha konvite ruma ita ba tuir hakarak ka la kohi ita tenke koalia Inglesh,”Deputada ne’e dehan.

Iha sorin seluk Deputadu Mario Viegas Carrascalao katak, lian Inglesh tenke hatene, tanba iha mundu tomak koalia lian ne’e.

“Uluk iha lian rua mak importante, Inglesh ho Francesa mais ikus mai Francesa ladun ona Inglesh mak hanesan domina Internasional,” Deputadu Carascalo dehan.

Deputadu husi Bankada Partidu Sosial Demokrata (PSD) ne’e afirma, Timor-Leste la uza lian Inglesh sai lian ofisial ba Timor tanba la hanesan ho kultura Timor ninian.

“Mais Inglesh ne’e ita la hatene ne’e ita bo’ok an ladiak iha mundu tanba lingua halo perdagangan, komersiu sasan sira ne’e hotu ne’e uza Inglesh tanba relasaun Internasional,” tenik Deputadu Carascalao.