- Publika iha: 05 Outubro 2016
Ministerio Edukasaun (ME) identifika ona eskola (ensino baziku) lima hanesan pilotu ba implementasaun programa to’os eskola iha Timor-Leste.
Eskola ensino baziku lima (identifikadu) ne’e mai husi munisipio Ainaro, Bobonaro, Aileu, Ermera inklui munisipiu Dili.
Diretor Jeral Ministerio Edukasaun, Antonio Pires hateten programa ne’e importante tebes atu eduka labarik sira kona ba nutrisaun no fo konese valor nutrisaun husi aihan lokal ba sira.
Nia dehan, programa ne’e hanesan atividade estrakurikular ida ba estudantes, tanba ne’e sei la fo impaktu ba sira nia prosesu aprendizajen.
“Ami hakarak implementa iha eskola hotu, maibe iha primeira faze ne’e avansa lai iha eskola balun, tanba programa ne’e durasaun tinan lima nian,” nia hateten hafoin asina MoU ho USAID iha Vila Verde, Dili.
Nia hateten, ministeriu fo ona orientasaun ba profesores husi eskola ne’ebe identifikadu ona hodi implementa atividades ne’e ho alunus sira.
Programa to’os eskola mak programa ida husi projetu agrikultura avansa ne’ebe sei implementa durante tinan lima nia laran.
Espesifiku ba programa to’os eskola ne’e, nia hateten sei implemnta husi ekipa projetu agrikultura avansa ho profesores no alunus sira, ne’ebe apoiu fundus husi United State Agency for International Development (USAID).
Entretantu espesialista Jestaun Projetu USAID, Flavia da Silva hateten povu Timor maioria moris husi vida agrikultura, maibe ema nia vontade servisu iha seitor ida ne’e hahu menus.
Tanba ne’e USAID hakarak dezenvolve programa to’os eskola hodi motiva fila fali labarik no foinsa’e sira hodi hatutan servisu ida ne’e.
“Atu fo hanoin ba ita nia estudantes no foinsa’e sira kona ba importansia setor agrikultura,” nia hateten.
Nia fiar, katak liu husi programa ida ne’e estudante sira sei iha konesementu ne’ebe diak no klean ba valor nutrisaun husi aihan lokal sira no bele kontribui mos ba iha programa merenda eskolar.
Nia dehan, ekipa projetu agrikultura avansa mos fo ona formasaun ba iha profesores husi eskola pilotu sira kona ba agrikultura sensivel ba nutrisaun no introdus mos metodu agrikultura modernu ne’ebe iha inklui ho prosesu halo adubu.
Alende ne’e, nia hateten sei iha mos kampanha nutrisaun no konsiensia saneamentu no kompetisaun kintal eskola.