Menu Merenda Eskolar Laiha Balansu Nutrisaun

Menu merenda escolar hetan kritika husi membrus parlamentu tanba laiha kualidade no laiha balansu nutrisaun.

Membru Parlamentu (MP) Nasional, Manuel Castro hateten, problema merenda eskolar dalabarak ona membru parlamentu sira kestiona, maibe nunka halo asaun atu rezolve.

“Hau ba iha postu administrative Uato-Carbau, mestre ida mai hateten ba hau katak governu haruka tiha fos, maibe osan laiha atu sosa modo e fos sira ne’e sai fohuk hotu, labele fo han labarik sira,” nia hateten iha plenaria. 

Objetivu husi programa merenda eskolar ne’e, nia dehan atu fo aihan nutrisaun ba estudantes no fasilita sira tuir aula, tanba dadus hatudu antes implementa programa ne’e labarik barak husik aula hodi fila ba uma, tanba hamlaha. 

Nia lamenta, tanba estado gasta osan sosa fos toneladas husi rai liur mai atu distribui ba komunidades inklui ba merenda eskolar, maibe fos sira ne’e estraga deit, tanba laiha kualidade. 

Preokupasaun hanesan mai mos husi MP Josefa Alvares Soares, katak governu halo diskriminasaun ba eskola publiku no privados, tanba tinan ne’e (2016) eskola privado laiha merenda eskolar. 

“Merenda eskolar iha eskola privadu nafatin atraza, halo labarik sira la goza sira nia direitu,” nia lamenta.

Iha tinan kotuk (2015), Ministerio Edukasaun ho diocese sira estabelese ona komisaun ida hanaran Konetil hodi halo jestaun ba iha programa merenda eskolar iha eskola privado sira. 

Ho ida ne’e, nia husu governu atu halo investigasaun ba komisaun ida ne’e.

Entretantu Diretora organizasaun Hamutuk Ita Ajuda Malu (HIAM) Health, Rosaria Martins da Cruz hateten aihan balansu no nutrient, merenda eskolar la tama iha estandar, tanba laiha valor nutrisaun. 

Nia hateten, labarik sira lor-loron konsumu hahan ne’ebe laiha balansu nutrisaun etu, sosis, ayam potong, manu-tolun, no na’an, modo tahan balun, maibe ho kuantidade ne’ebe ki’ik los. 

“Labarik sira insufsiente aihan iha sira nia familia, mai iha eskola fo han tan hahan ne’ebe laiha valor nutrisaun, ne’e lahadia sira nia saude,” nia hateten. 

Tuir nia, bainhira governu la hadia menus merenda eskolar, entaun ida ne’e sei kontribui ba malnutrisaun iha rai laran.

Nia hateten, governu liu –liu ministerio saude no edukasaun tenke servisu hamutuk hodi hasai menu nasional ida atu sai matadalan ba fornesedor sira la’o tuir. 

Nia dehan, menu ne’e tenke iha aihan fo protesaun, haburas no fo forsa tanba labarik sira presiza han aihan sira ne’e.