- Publika iha: 28 Fevereiro 2017
Laboratorium fakuldade medisina iha Universidade Nasional Timor –Lorosa’e (UNTL) dadun ne’e menus fasilidades hodi impede estudantes halo pratika loron-loron.
Tuir dekanu fakuldade medisina João Martins, hateten laboratorium ne’e importante tebes no parte ida husi formasaun universitario nian, entaun presiza fo atensaun
“Atu hasa’e kualidade ensino universidade nian, tenke iha komitmentu atu investe iha laboratorium, estudantes tenke hetan pratika ne’ebe diak,” dekanu Martins hateten, iha Liceu, Dili.
Nia rekonese, katak sira nia fatin iha maibe ekipamentus mak menus no reagente balun laiha hodi fasilita estudante sira halo pratika.
La’os fakuldade medisina deit, maibe kuaze fakuldade hotu inklui biologia, engineering mos hasoru problema ne’ebe hanesan.
Nia dehan, durante ne’e estudantes fakuldade medisina ba fali halo pratika iha laboratorium nasional inklui iha klinikas hodi haklean materia ne’ebe sira aprende ona.
“Ita tenke prepara sira nune’e bainhira sira ba pratika iha klinika labele hakfodak ho ekipamentus ne’ebe iha, maibe ida ne’e mak realidade ,” nia hateten.
Entretantu Membru Komisaun F (saude, edukasaun, kultura, veteranus e igualidade jeneru), Eladio Faculto hateten laboratorium ensino sai preokupasaun bo’ot ba sira, tanba kada tinan aloka osan ba universidade maibe seidauk bele rezolve.
“Laboratorium fakuldade medisina nian laiha duni kondisaun, fatin klo’ot, ekipamentus la kompletu, enkuantu estudante sira tenke pratika hodi hasa’e sira nia konesementu,” nia dehan.
Entaun, nia ejiji ba universidade tenke fo duni prioridade hodi hadia laboratorium fakuldade medisina nian, tanba estudante sira ne’e sei fo atendementu saude ba ema barak bainhira sira nia estudu remata.
Enkuantu kada tinan, nia hateten Parlamentu Nasional tau orsamentu hodi hadia laboratorium kada fakuldade iha UNTL, maibe universidade la tau prioridade asuntu ne’e. “jestaun mak ladiak,” nia dehan.
Kompara ho universidade privadu, nia dehan universidade privadu balun nia laboratorium diak liu UNTL nian.