Merenda eskolar paradu, estudante fila sedu

Hafoin programa merenda eskolar paradu durante fulan neen (6) ona iha eskola, estudante sira fila eskola sedu tanba hamlaha e ida ne’e impede ba iha prosesu aprendijazen.

“Ita nia oan sira ne’ebé maka toman ona han iha eskola ne’e durante ne’e, agora ladun ativu ona ba eskola ka fila sedu tanba hamlaha, e sira han bosu tiha mak mai fali, ne’e problema,” kestiona Xefe Suku Ban Afi, Distritu oe-Cusse, Jose Tefa, semana kotuk, iha Oe-Cusse.
Alende ne’e Xefe Suku ne’e mos  husu promesas ne’ebe Governu no World Food Program promote hodi sosa komunidade sira nia produtu local ba menu merenda eskolar, ne’ebe to’o ohin loron la realiza.

“Dehan atu hola ami to’os nain sira nia modo, batar, ai farina no seluk tan e to’o ohin loron ami la hetan ida, keta halo sai fali hanesan MTCI nia programa povu kuda governu sosa,” Xefe Suku ne’e katak.

Entretantu Reprezentante  WFP Distritu Oe-Cusse, Luis Colo katak  desde tinan kotuk WFP la halo ona distribuisaun aihan ba eskola hotu, maibe   governo liu husi ministeriu Edukasaun mak toma konta hotu.

“Hakarak hateten deit ba ita bo’ot sira katak, desde Agustu tinan 2011, WFP la toma konta ona kona ba distribuisaun aihan ba eskola, oras ne’e ita nia governu maka responsabiliza fali ona,” hateten Reprezentante WFP,Colo.

Hatan ba kestaun ne’e Ofisial Edukasaun Rejional Distritu Oe-Cusse, Damião da Costa katak, programa merenda eskolar ne’ebe agora paradu iha eskola hotu, ne’e responsabilidade governu nian.

“Ne’e la’os kulpa ami nian, nasional maka aloka orsamentu mai tarde, e oras ne’e iha hela prosesu nia laran, no husi Diresaun Ensino Baziku maka sei toma konta, ita espera tempu badak bele ona ativa fali,” Ofisila ne’e dehan.

Nia mos husu ba Lider Komunitaria sira atu mobiliza a to’os na’in sira hodi  prepara produtu local,  tanba Ministeriu Edukasaun iha politka atu utiliza ai han lokal ba merenda eskolar.