Profesores Ba Area Espesializada Sei Menus

Timor –Leste Coalition for Education (TLCE) preokupa ho politika ministerio edukasaun nian ne’ebe transforma ensino sekundario jeral balun ba ensino tekniku vokasional, tanba profesores ba area espesializada sei limitadu inklui laiha ekipamentus pratika nian.

Sekretario Nasional TLCE, Jose de Jesus hateten politika diak maibe presiza konsidera asuntu importante hirak iha leten ne’e hodi haforsa iha implementasaun.

“Lolos ne’e, ministeriu halo uluk estudu viabilidade ba iha transformasaun ensino vocational ne’e rasik intermus rekursus humanus no fasilidades iha ona foin halo transformasaun,” nia hateten iha nia knar fatin Kaikoli, Dili.

TLCE konsidera, politika ida ne’e atu responde ba nesesidade politikas deit maibe la refleta ho situasaun real ne’ebe iha, tanba laiha implementasaun ne’ebe diak.

Nia fo ezemplu balun, hanesan Ensino Tekniku iha Hera, iha edifisio diak no foun maibe fasilidade laiha hodi estudante sira halo pratika.

Iha parte seluk, Membru Parlamentu (MP), Agostinho Lay konkorda governu harii ensino tekniku vocational barak, maibe tenke fazeiada, la’os munisipio hotu dala ida.

Tanba nia dehan, edukasaun sei iha problema bo’ot liu –liu menus profesores iha material espesializada sira inklui kondisaun infra-estrukturas no livrus. 

“Profesores iha ensino sekundario jeral barak mak laiha, agora ita estabelese tan ensino tekniku vokasional iha munisipios,” nia kestiona.

Nia dehan, iha munisipio Ermera iha ensino tekniku vocational 6 mak estabelesidu, maibe sei hasoru problema oioin iha prosesu aprendizajen.

Nia mos, husu governu atu kontinua fo atensaun ba ensino tekniku vocational ne’ebe harii ona liu –liu hadia fasilidade no kompleta ekipamentus inklui forma profesores atu bele garantia nia kualidade.