- Publika iha: 27 Setembro 2017
Diretor Eskola Ensino Sekundaria 4 de Setembru Balide Alberto da Costa Braz bandu nia alunu sira, liu-liu feto, labele hatais farda badak ba eskola tuir regras eskola nian.
Tanba tuir nia, eskola forma ema atu disiplina iha tempu estudu hodi prepara sira ba futuru ne’ebe diak.
“Ami iha regulamentu ne’ebe regula estudante sira labele hatais farda mini, labele pinta ibun no pinta fuuk halo mean,” Diretor Braz hateten iha fatin, Dili.
Nia hateten, bainhira mestre sira haree iha aluna balun hatais farda mini maka parte eskola sei fo sansaun ba estudante ne’e. Ba estudante mane, regulamentu eskola mos bandu labele uza brinkus iha tilun no inus.
“Regras eskola la autoriza sira uza brinkus iha tilun no inus no hatais mini, no karik balun kontra maka sira sei hetan sansaun husi eskola,” nia hateten.
Tanba ne’e nia husu ba foinsa’e sira liu-liu estudantes, labele adopta ema rai seluk nia modelu hatais, maibe tenke hatene aan katak Timor iha kultura no kustume ne’ebe presiza mantein.
Entretantu Estudante Cristal Aurelia de Jesus husu ba parte Ministeriu Edukasaun inklui kada eskola ida-idak atu kria lei no regulamentu ida hodi bandu alunu sira liu-liu ba feto sira labele hatais ropa mini.
“Tenke utiliza nafatin ropa tempu pasadu nian naruk-naruk,” nia sujere.
Enkuantu hatan ba kestaun ne’e, Diretor Jeral Ministeriu Edukasaun (DJ-ME) Antoninho Pires hateten ministeriu iha ona dekretu lei ida ne’ebe koalia kona ba disiplina no komportamentu ba profesores inklui mos estudante sira nian.
“Labarik sira labele uza ropa ne’ebe vulgar ga hatais ropa ba festa nian, ne’e laloos, tenke hatais ropa tuir estudante nian,” nia hateten.
“Nune’e, labele kria fali kecemburuan no desekilibre social.”
Alende ne’e, nia mos husu ba professor sira hotu atu hakbesik ba alunus sira hodi kumpri regulamentu internu eskola nian ho diak.