Organizasaun Feto Triste Estruturas VII Governu Domina Husi Mane

Tristeza bo’ot ba iha organizasaun feto sira tanba estruturas VII governu konstitusional ba periodu 2017-2022 numeru feto kuaze ke atu laiha no domina husi mane.

Husi membrus VII governu konstitusional nain 32 ne’ebe simu ona pose iha primeira no segunda faze, iha deit feto nain tolu mak tama iha estruturas ne’e, restu mane.
Maske iha posibilidade atu numeru feto sei aumenta iha tomada de posse ba terseira faze ne’ebe sei tuir mai, maibe Diretora Organizasaun Movimentu Feto Foinsa’e (MOFFE), Yasinta Lujina hateten nafatin laiha balansu jeneru tanba numeru feto ki’ik liu.
Husi organizasaun feto seidauk hatene razaun lolos kona ba partisipasaun feto menus iha estruturas governu ba periodu ida ne’e, maibe nia dehan la’os tanba feto laiha kapasidade no abilidade, ne’e la’os razaun.
“Hau hanoin triste ba ita hotu liu –liu feto Timor, tanba ne’e hatudu katak feto Timor lahetan konsiderasaun hodi hola parte iha prosesu dezenvolvimentu,” nia hateten via telefone.
Nia hateten, organizasaun feto sei servisu hamutuk ho organizasaun feto partidus politiku hodi koalia ho xefe governu no xefe estadu atu konsidera feto iha tomada de pose III faze ne’ebe sei akontese iha tempu badak.
Nia husu, mos ba partidus politiku atu konsidera buat ne’ebe hakerek ona iha konstituisaun da republika kona ba igualidade jeneru no kouta 30% ne’ebe garantia ona iha lei atu asegura partisipasaun feto iha kargu foti desizaun nian iha setor hotu.
Entretantu, Diretora organizasaun Caucus (feto iha politika), Paula Corte Real rezeita hodi fo komentariu sobre asuntu ne’e, tanba sei iha III faze.
Nia dehan, sira satisfas bainhira iha lista membru governu ba III faze ne’e iha feto nain tolu ka hat involve iha governu, maske ho numeru ki’ik.
Nia fiar, katak iha lista tuir mai sei iha feto maluk balun tanba partidus koligasaun Fretilin no Partidu Demokratika (PD) durante ne’e apoiu tebes ba iha advokasia promosaun feto iha vida politika.
“Ami fiar, iha lista sira tuir mai sei iha reprezentasaun feto ne’ebe sei involve iha governu,” nia esperansa.
Nia dehan, iha partidu Fretilin rasik iha organizasaun feto mak Organizasaun Popular Mulher Timor (OPMT) ne’ebe feto barak iha kapasidade no abilidade kaer pasta iha governu, maibe governu koligasaun ne’ebe adopta governu inklusivu tenke involve ema hotu.
Iha governu anterior feto hamutuk nain 8 mak kaer pasta iha governu, hanesan Ministra Saude, Ministra Finansas, Ministra Solidaridade Social, Vise Ministra Saude, Vise Ministra Edukasaun, Sekretario Estadu Apoiu Sosio- ekonomia Feto, Sekretaria Estado Arte e Kultura no Sekretaria Estadu Apoiu Parlamentar.