Sexta, Março 29, 2024
Total visitors: 766366

Atu prevene estudante sira husik eskola, Edukasaun Munisipio Aileu servisu hamutuk ho Asosiasaun Feto halo sosializasaun kona ba importansia edukasaun ba estudantes no inan- aman sira.

Diretora Rede Feto Timor–Leste Dinorah Granadeiro hateten governu seidauk iha politika ida hodi lori hikas feto foinsa’e sira isin rua ba eskola hodi halo remata estudu.

Diretora Edukasaun munisipiu Aileu, Cristina da Conçeicão hateten esforsu ne’ebe sira halo mak sensibiliza estudantes no inan -aman sira atu fo apoia tomak ba oan sira nia estudu, tanba dadus hatudu katak estudante barak husik eskola, tanba lahetan supporta husi familia.
Nia dehan, sosializasaun ne’e hala’o bainhira hahu matrikula foun kada tinan no halo enkontru regular ho inan-aman sira.
“Futuru iha sira (estudantes) nia liman rasik, katak sira mak sei foti desizaun ba sira nia aan entaun ita presiza desimina informasaun sira kona ba importansia edukasaun ba sira, hodi sira hola desizaun diak no lolos,” nia hateten via telephone.
“Tanba edukasaun mak sei bele eleva sira nia konesementu diak iha futuru.”
Kauza ba labarik sira husik eskola ne’e, nia dehan la’os deit falta supporta husi familia, maibe iha mos razaun seluk hanesan distansia do’ok no hetan dezastre isin rua sedu.
Kona ba dadus estudante husik eskola iha munisipio Aileu, nia dehan la dekor dadus konkreta, maibe iha estudante balun ne’ebe sai husi eskola tanba razaun sira ne’ebe temi iha leten ne’e.
Entretantu, Diretora Rede Feto Timor –Leste Dinorah Granadeiro hateten to’o agora governu seidauk iha politika ida hodi lori hikas feto foinsa’e sira ne’ebe isin rua ba eskola hodi halo remata estudu.
Nia dehan, Timor –Leste hanesan mos nasaun membru ne’ebe ratifika konvensaun CEDAW iha obrigasaun atu kria politika ida ne’e hodi asegura feto sira asesu ba edukasaun formal.
Nia informa, tinan kotuk komite CEDAW halo segundu rekomendasaun ba estado Timor –Leste atu aselera lalais politika ida ne’e, maibe seidauk iha asaun.
“Liu –liu Ministerio Edukasaun atu implementa politika ida hodi lori fila hikas alin feto sira ne’ebe isin rua sedu ba eskola, tanba ida ne’e ba II rekomendasaun ona husi komite CEDAW ba estado Timor-Leste,” nia hateten.
Nia rekonese, informalmente iha eskola ida-rua mak simu ona estudante sira ne’e, maibe la’os eskola hotu, entaun politika ida ne’e hanesan baze legal ida ba eskola hotu hodi implementa politika ne’e ho formal.
Iha parte seluk, Prezidente Fundasaun Cristal Agustinho Gonsalves hateten Ensino Cristal simu estudantes sira ne’ebe gravida fila mai eskola depois partus, tanba edukasaun importante tebes atu hadia ema nia moris iha futuru.
“Ami durante ne’e nunka hasai estudantes, tanba ami nia hakarak ema ne’ebe iha ne’e tenke hetan diploma, maibe bainhira inan -aman mak mai husu atu hasai ami hasai,” nia hateten.
Nia dehan, bainhira estudantes sira involve iha problema ruma, profesores sira iha obrigasaun atu ajuda hodi rezolve problema e la’os atu hasai husi eskola. *
Caption: Xefe suku Akadiru-Hun, Juvinal Conçeicão husu ba joven sira atu sai autor ba iha kombate HIV/SIDA liu husi ransu livre ne’ebe edukativu.