Timor-Leste iha nia kurikulum eskolar rasik

Maske fou-foun ukun aan Timor-Leste sei adopta kurikulum eskola husi nasaun Indonezia, maibe agora iha ona kurikulum eskolar rasik ne’ebe uja hodi hanorin iha eskola sira hotu, liu-liu iha Ensino Baziku.

“Iha Ensino Baziku agora mestre sira hanorin alunus sira ho lian Portugues, tanba ita iha ona kurikulum ba ensino baziku,” hateten Diretor Jeral Ministeriu Edukasaun, Apolinario Magno, (04/07), iha Vilaverde, Dili.
Diretor Jeral ne’e mos rekonese katak,  eskola Ensino Sekundariu rasik seidauk iha nia kurikulum, maibe agora iha prosesu elaborasaun nia laran.

“Neste momentu rekomendasaun husi Ministeriu da Edukasaun katak,ita komesa ona uja Portugues hanesan lingua instrumentu e ao mesmu tempu lian Tetun hanesan lingua ofisial ne’ebe implementa ona iha eskola sira,” Diretor Jeral dehan.

Iha sorin seluk Sekretariu Jeral Sindikatu Profesores (SPTL), Francisco da Costa Fernandes, katak,Livrus sira ne’ebe mak hanorin iha eskola sira, nafatin uja sistema Indonezia nian tanba livru Indonezia nian mak tradus fali ba Portugues.

“Tanba livrus sira ne’e iha parte balun la koalia kona ba situasaun Timor nian, e barak liu koalia kona ba Indonesia nian,” SJ-SPTL Fernandes kritika.

Livrus sira ne’ebe mak uza hanorin iha eskola sira mak hanesan, livru Sosiolojia, Antropologia no Geografia. “iha livrus hirak ne’e la koalia kona ba rendimentu populasaun ninian no riku soin kada distritu ida-idak nian,” SJ.SPTL ne’e tenik.