- Publika iha: 19 Fevereiro 2018
Diretor Nasional Aksaun Sosial iha Ministeriu Edukasaun, Belchior Maria Barros Almeida hateten implementasaun Saude Eskolar iha eskola sira dadaun ne’e la la’o tanba laiha orsamentu ba programa ne’e.
Nia hateten, iha tinan kotuk sira halo ona serviso ho Ministerio da Saude hodi estabelese matadalan ida hanaran screening atu haree kona ba isin lolon ninian.
“Ita haree oinsa atu orienta labarik sira moris saudavel, moris diak, moos, ita hanorin sira katak mai tenke hariis, hatais ropa moos,” nia hateten, iha Dili.
Nia dehan, atu hasees aan moras ne’ebe mai husi liman kukun tenke moos, tenke kose nehan, loron- loron tenke haris no haris fatin tenke moos.
“Iha mos matadalan ida, oinsa ita atu tetu labarik sira no hatene sira nia siklus, ita bele dehan katak fulan tolu dala ida kona ba sira nia kilo ne sa’e ka la’e e ami servisu hamutuk ho Ministerio da Saude,” nia hateten.
Nia dehan, iha matadalan ne’e hetan ona aprovasaun no tun ona ba baze hodi halo treinamento ba eskola sira hodi sira bele komprende no bele implementa ona.
“Maibe agora seidauk kontinua tanba iha Janeirono Fevereiro ne’e, ita orsamentu laiha, ita hakarak ne’e iha fulan badak nia laran governasaun iha ona buat sira ne’e bele la’o normal,” nia informa.
Entretantu Diretor Ensino Baziku Filial (EBF) Rumbia, Abilio Pereira da Conceicão hateten, sira nia eskola sempre hetan vizita husi pesoal saude sira husi postu saude Vera Cruz.
“Postu Saude Vera Cruz besik liu ami, e sira sempre fo atensaun mai nia eskola, halo sosializasaun saude eskolar ba estudante sira,” nia hateten.
Nia dehan, kada fulan neen sira mai halo tratamento, distribuisaun ai moruk, vitamina A compriminozos ba lumbringa ne’ebe kauza ba ain potis e dadaun ne’e sira halo hela suprivisaun ba lepra iha eskola ne’e.
“Hau ema ida ne’e favoresido iha saude, hau nia linkungan sempre moos, ami serviso hamutuk ho komunidade hodi hamoos ami nia valeta sira,” nia hateten.
Nia hateten, estudante sira iha eskola ne’e hotu hotu hatene prevene aan husi moras.