Merenda Eskolar La La’o Tanba Laiha Orsamento

Desde tama tinan foun 2018, Janeiru to’o agora programa merenda eskolar seidauk la’o iha eskola sira tanba laiha orsamentu.

Diretor Nasional Aksaun Social Eskolar Belchior Maria Almeida Barros Guerra hateten, orsamento seidauk iha atu hala’o programa merenda eskolar ne’e.
“Iha inicio fulan Janeiro ne’e, hau konvida ona xefe administrasaun finansas husi munisipio hotu mai, ami fo orientasaun ba sira karik orsamento duadesimo ne’e to’o, sira bele implementa,” nia hateten, iha Dili.
Nia hateten, orsamentu duadesimo ne’e mai husi orsamentu 2017 nian ne’ebe sei kontinua uza to’o forma governu foun.
Nia dehan, dadaun ne’e merenda eskolar kuaze eskola hotu seidauk la’o maske tama ona fulan Fevereiru (klaran) ona.
“Nafatin halo monitorizasaun e kuaze munisipio barak mak hatama ona sira nia proposta atu uza osan duadesimo e iha semana kotuk balun telefone dehan sira nia osan sai ona,” nia hateten.
Maibe, nia dehan,osan ne’e ba fulan ida deit, osan ne’e depende ba volume estudante kada munisipio ida –idak .
Entretanto Diretor da Eskola Ensino Baziku Filial( EBF), Rumbia Abilio Pereira da Conceicão reforsa katak sira nia eskola mos to’o agora seidauk la’o programa merenda eskolar, tanba osan laiha.
“Tanba difikuldades ne’ebe mak ita hasoru, ne’ebe prosesu ne’e sei demora oitoan,” nia hateten.
“ Ita hein katak fulan ida ne’e hotu, ita hala’o programa ne’e.”
Maske nune’e, nia hateten prosesu aprendizajen kontinua la’o no mestre/a sira mos ativu hotu.