Oe-cusse: Estudantes Konfuzaun Ho Implementasaun Kurikulum Foun

Implementasaun kurikulum foun iha Timor-Leste nian iha eskola sira hotu iha teritoriu tomak iklui mos iha Distritu Oe-Cusse, halo estudante sira husi ensino baziku to’o sekundariu (publiku no privadu) sai konfuzaun tanba material ne’ebe sira hetan iha izame, la hanesan ho material ne’ebe sira hetan durante prosesu aprendijazen.
“Hau ho kolega sira, preparadu hodi tuir izame, maibe iha preokupasaun oituan kona ba implementasaun kurikulum foun iha izame ne’e, ami molok fulan ida hodi hasoru izame,foin uza kurikulum ita nian, ne’ebe nia impaktu ladun diak mai ami,” preokupa Estudante Eskola Sekundariu Santo Antonio, Adriano Elo, foin lalais hafoin tuir izame, iha Oe-Cusse.

Maske nune’e, nudar estudante tenke esforsu an nafatin oinsa mak bele hetan valores ne’ebe diak maske material ne’ebe sira simu iha izame ne’e foun.

Iha fatin seluk Diretora Escola Ensino Baziku Santo Antonio Oe-Cusse, Ana Faria hateten sira seidauk bele identifika lolos impaktu husi implementasaun kurikulum foun ne’e.

“Maibe depois de izame foin hare valores alunus atu nune bele hadia buat balun,” hateten Diretora ne’e.

Entertantu Diretor Eskola Sekundariu Santo Antonio Oe-Cusse, Pedro da Crus rekonese katak ho implemtasaun kurikulum foun ne’e sei difikulta alunus sira.

“Ameasa oituan ba alunus sira, tanba durante ne’e ami nia profesores sira hanorin ho kurikulum tuan, derepente atu tama ba izame implementa fali kurikulum ita nian,” Diretor da Crus kestiona.

Enkuantu total alunus husi primeiru to’o terseiru klase ne’ebe partisipa iha izame hamutuk atus tolu sia nulu resin (390 resin).