Dosente Nain 3 Simu Posse Ba Estrutura Pro-Reitoria 2019-2021

Universidade Nasional Timor-Lorosa’e (UNTL) fo pose ba dosente nain tolu hodi tur iha estruturas pro-reitoria ba periodu 2019-2021.

Reitor Universidade Na-sional Timor-Lorosa’e (UNTL), Fransisco Miguel Martins hateten dosentes nain tolu ne’e nudar liman-ain reitor nian, ajuda reitor halo servisus ne’ebe iha, liu-liu dezenvolve siensia no teknolojia iha mundu durante periodu ne’e.
Nia hateten, pose ne’e hanesan prosesu dinamika iha dezenvolvimento insti-tuisional UNTL nian hodi atinje kualidade iha ensino superior.
“Ita atu fortifika instituisaun, ita tenke tau mos ema hodi asegura servisu ne’ebe mak ita hala’o hodi dezenvolve instituisaun liu-liu kualidade akademika iha ita nia instituisaun,” nia hateten, iha Dili.
Portantu, nia dehan reitor mesak labele halo servisu tanba universidade ne’e bo’ot tebes, entaun presiza rekursu hodi aselera no ajuda reitor hodi implementa politika instituisaun ne’ebe mak iha.
“Ida ne’e mak ita halo, fo pose ba dosente nain tolu ne’e hodi tau responsablidade ba pozisaun iha sira ida-idak nia area hodi garante kualidade instituisaun ba ema hotu,” nia dehan.
Pro- Reitor nain tolu ne’ebe simu pose ne’e komposto husi dosente feto ida no mane nain rua. Dosente Teresa Antonio Soares simu pose nudar pro-reitora ba asuntu provedoria, akolhamentu no asistensia psikolojia ba estudantes no profesores.
Enkuantu, nia dehan Professor Marcos Antonio Amaral simu posse nudar pro-reitor ba asunto kontrolu ba kualidade ba instituisaun no Professor Miguel Maia dos Santos simu pose nudar pro- reitor ba asunto akademiku, sira nia mandatu to’o tinan rua (2019 -2021).
Nia dehan, pose ne’e hodi sustenta dezenvolvimento instituisaun hodi eleva kualidade ensino, jestaun, peskiza, administrasaun publika no desiminasaun konesementu, kriasaun no inovasaun ba estudante no professor sira.
Entretantu Pro- Reitor Miguel Maia dos Santos, hateten atu atinji vizaun UNTL nian ne’ebe hatur ona, maka instituisaun ka sentru de siensia presiza buat barak hodi la’o to’o iha ne’eba.
“Ohin hau atan assume kargo foun ne’e, uluk iha kargo provedoria no konselhamento agora ba fila- fali iha asunto akademika,” nia dehan.
Nia dehan, tanba asuntu akademika tenke hala’o fali nia knar foun, ho ida ne’e mak nia substitui hodi kuntinua buat ne’ebe mak estabelese tiha ona no haree buat foun ruma, hanesan baze ida atu bele dezenvolve no hatur tuir baze legal ne’ebe mak vigor iha Timor no estatuto UNTL nian.
“Hau pronto toma responsabilidade ba asuntu akademiku ne’e, bazeia ba lei baze de edukasaun no politika nasional edukasaun nian, atu bele dezenvolve rai ida ne’e ho nia rekursus humanus ne’ebe iha kualidade,” nia hateten.