Dosente UNPAZ Prepara Rasik Modul Hodi Hanorin Estudantes

Vise Reitor Universidade da Paz (UNPAZ), Manuel dos Santos hateten durante ne’e dosente sira iha UNPAZ prepara rasik sira nia modul hodi hanorin estudante sira.

Nia hateten, modul ne’ebe mak uza hodi hanorin ne’e, dosen ida-idak mak prepara nia modul, maibe regras tuir universidade nian.
“Dosente sira prepara modul depois hatama iha ami nia Unit Penelitian Pendidikan hodi haree sira nia modul ne’e, han malu ka la’e, tuir duni regras ne’ebe universidade hasai ka la’e, kuando seidauk los labele uza tenke hadia fali,” nia hateten, iha kampus UNPAZ, Dili.
Nia dehan, sira implementa sistema modul tanba UNPAZ universidade privado e sira tenke aplika ida ne’e, nune’e hanorin estudantes mos bele hatene buat ruma.
“Estudante sira tenke hatene kona ba area ne’ebe mak sira foti ona,” nia dehan.
Nia dehan, uluk sira seidauk hamosu modul ida, dosen balun hanorin uza deit surat tahan oan ida, halo ringkasan hodi tama hanorin estudante sira.
“Ami haree ida ne’e la diak, entaun ami muda sistema, halo modul sai livru hodi hanorin estudante sira,” nia dehan.
Nia dehan, modul ne’e kompletu e estudante sira bele hetan modul ne’e, sira kopi rasik atu nune’e dosente sira hanorin sira bele akompanha ho modul ne’ebe estudante iha.
Enkuanto total dosente ne’ebe mak hanorin iha UNPAZ, nia dehan kuaze 300 (permanente ho kontratadu), sira ne’e maioria ho nivel Strata 2 ho Strata 3, Strata 1 ne’e iha nain ida -rua deit.
Entretantu Diretor Nasional Ensino Superior Tekniku, Luis Aparicio hateten dosente hotu kuandu hanorin tenke iha silabus ka topiku ne’e aprezenta kompletu duni hodi hanorin.
Maibe, nia dehan dadaun ne’e universidade sira seidauk tuir kurikulum ne’ebe hasai husi Ministeriu Ensino Superior, sira sei uza sistema rasik maibe kada fakuldade tenke hetan akreditasaun no tenke iha kordenasaun ho ministerio.
“Ami iha tinan kotuk prepara ona padraun kurikulum minimu ba ensino superior sira atu implementa maibe husi ministerio seidauk aprova,” nia dehan.