- Publika iha: 15 Fevereiro 2019
Vise Reitor Universidade da Paz (UNPAZ), Manuel dos Santos garante katak problema saneamentu baziku ne’ebe dadaun ne’e universidade infrenta, sei rezolve iha tempu badak, nune’e estudantes bele asesu ho seguru.
“Haris fatin diak hela maibe tanba estudante barak, sira tama- sai haris fatin odamatan taka riba deit hodi rezulta to’o aat, ikus mosu violensia sexual,” nia hateten, iha Dili.
Portantu, nia dehan sira orienta ona ba tekniku husi universidade rasik atu nune’e bele rezolve lalais problema ne’e.
“Ami enkontro ona, sira la halo sira nia serviso ami sei fo sasaun ba sira, atu nune’e sira iha disiplina hodi halo sira nia servisu,” nia dehan.
Nia dehan, iha tinan hira ba kotuk ne’e violensia sexual akontese tanba kondisaun haris fatin ladiak.
“Maibe depois ida ne’e ami muda ona sistema, staf ida-idak iha nia knar tenke kontrola sira nia serviso no ikus ne’e problema hanesan ne’e la akontese ona” nia dehan.
Nia garantia, katak iha tempo badak sei rezolve problema ne’e, saneamento baziku, hanesan odamatan laiha no ahi laiha, tenke rezolve atu nune’e labele mosu tan problema.
Entretanto Diretora Ezekutivo Forum Komunikasaun Feto Timor-Leste (FOKUPERS), Maria Jose Guterres hateten kona ba infraestrutura baziku ba eskola sira hahu husi ensino baziku to’o universidade, ne’e importante tebes liu-liu bee no saneamento ba estudante sira.
“Importante liu ba estudante feto sira, sira ne’e maka risku liu, liu-liu bainhira bainhira menstruasaun, laiha bee moos, laiha sintina ne’ebe mak adekuadu, ida ne’e bele intrompe sira nia prosesu aprendizajen iha aula laran,” nia hateten.
Tanba ne’e, nia dehan, kuando eskola iha haris fatin ne’ebe mak la adekuadu, odamatan ne’ebe mak aat, bele akontese mos abuzu sexual iha eskola tanba dalaruma mane sira sa’e tiha iha haris fatin leten hodi hafuhu feto sira.
“Kondisaun sira ne’e, fo risku ba feto sira ba abuzu sexual iha eksola,” nia dehan.