MEJD Aloka $32 mil Ba Peskiza Implementasuan Merenda Eskolar

Ministerio Edukasaun Joventude no Desporto (MEJD) liu husi Diresaun Nasional Aksaun Sosial Eskolar aloka $32 mil hodi halo peskiza ba implementasaun programa merenda eskolar no mos desporto eskolar ba eskola hotu.

Diretor Nasional Aksaun Sosial Eskolar, Belchior Maria Almeida Barros Guerra hateten alende peskiza, halo mos formasaun ba fornesedor programa merenda eskolar nian.
“Ita presiza hatene, merenda eskolar ne’e la’o diak ka la’e iha eskola sira, oinsa ho kualidade menu ne’ebe iha, karik buat ruma la’o ladun diak, ita presiza hadia ida ne’e,” nia hateten, iha Dili.
Kona ba formasaun ba fornesedor programa merenda eksolar, nia dehan presiza duni fo formasaun ba sira tanba desde tinan 2014 to’o agora seidauk fo formasaun ruma ba fornesedor sira.
“Tinan 2019 ne’e, ita tau ona osan $32 mil hodi halo peskiza, reve fali manual ne’ebe mak produs iha 2013 ne’ebe mak kompetensia tomak ne’e mai iha Ministeriu Edukasaun liu husi diresaun nasional aksaun social nune’e bele jere ho diak,” nia dehan.
Nia dehan, programa merenda eskolar deskonsentra ona ba munisipiu ida-idak iha 2017 kedas hodi jere rasik sira nia orsamentu, maibe politikamente atu hadia ne’e nafatin iha Ministeriu Edukasaun.
Enkuanto nia dehan , iha mos orsamento $32 mil ne’e tau mos programa desportu eskolar ba eskola hotu iha munisipio sira hodi kria amizade entre eskola, hasa’e estudante sira nia talentu iha mundu desportivu nian.
Nia dehan, total orsamentu ba Diresaun Nasional Aksaun Sosial Eskolar tinan 2019 ne’e hamutuk $228 mil, uza ba salario, viagen lokal no mos serviso operasionais, enkuantu ba merenda eskolar ne’e sei aloka iha munisipio ida-idak.
“Ba servisu operasionais hetan $88 mil, peskiza programa merenda eskolar no desporto eskolar hamutuk $32 mil,” nia dehan.
Nia dehan, objetivo husi peskija ne’e atu hatene tuir situasaun implementa antes programa merenda eskola no agora intrega ba munisipio ne’e nia lala’ok ne’e oinsa.
Entretantu Sekretario Nasional rede edukasuan Timor-Leste Coalition for Education (TLCE), Jose Monteiro hateten TLCE prontu kontribui ba governu hodi halo peskiza ba implementasuan merenda eskolar iha eskola sira.
“Sira bele halo peskiza hodi halo levantamentu dadus ne’ebe ho kualidade diak, analiza klean sistematiku hodi bele hatene saida mak bele hadian,” nia dehan.
Nia dehan, TLCE rasik mos halo ona peskiza ba implementasaun programa merenda eskolar e rezultado husi peskiza ne’e hato’o ona ba Ministerio Edukasaun inklui ba Provedoria Direitus Humanus hodi haree no analiza.
“Karik informasaun sira ne’e seidauk klaru, dadus hirak ne’e seidauk adekuadu, sira bele halo tan la tanba sira nia serviso mak ida ne’e duni,” nia dehan.
Nia dehan, kona ba programa desporto eskolar ne’e iha kurikulun iha tina ona maibe implementasaun mak menus tanba kada eskola seidauk iha kampu rasik.
“Maibe hau fo apoia, importante mak Ministeriu Edukasuan tenke iha planu adekuadu hodi implementa, nune’e ikus labele mosu problema,” nia hateten.