Pesoal Saude Halo Promosaun Kuidadu Saude Oral Ba Estudantes

Iha ambitu selebrasaun loron mundial saude oral, ekipa pesoal saude husi Sentru Saude Becora, fahe informasaun no halo promosaun kona ba kuidadu saude oral ba estudante sira iha Ensino Baziku Filial Camea tanba labarik barak maka iha problema dental.

Xefe Sentru Saude Becora, Adelina Pinto hateten atividade ne’e la’os deit halo iha loron importante sira, maibe regular tanba atividade ne’e tama iha programa saude eskola ne’ebe implementa.
Nia dehan, implementasaun programa ne’e kada fulan ekipa mediku sira visita eskola sira atu fahe informasaun no halo promosaun ba labarik sira kona ba saude oral, matan, higiene pesoal, prevensaun moras sira no saude adolosente.
Nia hateten, programa ne’e kobre eskola hotu husi nivel infantile to’o iha ensino pre-eskolar nian tanba ne’e informasaun sira kona ba saude nian fahe ba estudante sira tuir idade no kuinesementu ne’ebe sira iha.
“Ita nia populasaun barak maka afeita moras ibun nian, tanba ne’e Ministerio Saude liu husi sentru saude sira sempre halo edukasaun no promosaun saude to’o iha baze no halo screening ba komunidade sira,liu –liu labarik,” nia hateten bainhira partisipa iha serimonia selebrasaun loron mundial saude oral iha Camea, Dili.
Iha oportunidade ne’e, nia apela ba ema hotu –hotu atu kuidadu saude oral liu husi hado’ok aan husi hahan ne’ebe midar no kose nehan ho produtu ne’ebe kualidade loron ida dala rua (depois matabisu no antes ba toba).
Entretantu, Kordenadora Eskola Ensino Basiku Filial Camea, Idelina Soares hateten implementasaun programa saude eskola ne’e diak tebes tanba sira iha koperasaun ne’ebe diak ho parte saude kona ba atu fahe informasaun saude ba estudante sira.
Nia dehan, liu husi programa ne’e professor/a sira hetan ona formasaun husi parte saude tanba ne’e durante aula disiplina saude professor sira halo esplikasaun ba estudante sira kona ba saude oral, matan no seluk tan.
“Ami iha materia sira kona ba edukasaun promosaun saude tanba ne’e bainhira disiplina kona ba saude professor sira esplika ba estudante sira lor-loron, la presiza ona ekipa saude sira mai,” nia hateten.
Nia dehan, kada fulan ekipa saude sira visita eskola alende fo edukasaun promosaun sira mos halo atendimentu hanesan screening ba estudante sira no halo vasinasaun.