Presiza Fo Formasaun Espesifiku Ba Profesores Eskola Vokasional

Sekretario Nasional rede edukasaun Timor Coalition for Education(TLCE), Jose Monteiro husu ba Ministerio Edukasaun, Joventude no Desporto (MEJD) atu fo formasaun espesifiku ba iha professor sira ne’ebe hanorin iha Eskola Tekniku Vokasional sira.

Nia hateten, durante ne’e ministeriu seidauk halo formasaun espesifiku ruma ba professor sira ne’ebe hanorin iha eskola tekniku vokasional sira ne’ebe eziste iha rai laran.
Durante ne’e, nia dehan ministerio halo deit formasaun kona ba materia jeral ba professor sira iha eskola sekundario jeral sira maibe ba professores ne’ebe hanorin iha eskola Tekniku Vokasional seidauk iha formasaun especial ruma.
“Ita husu ba Ministerio Edukasaun, tenke halo formasaun espesifiku ba iha profesores sira iha eskola tekniku vokasional sira tanba ne’e eskola vokasional e bainhira estudante sira akaba, sir abele kria rasik empregu ho skill ne’ebe sira iha,” nia sujere, iha Dili.
Nia dehan, ministerio tenke hadia sistema formasaun, fo formasaun espesifiku ba professors ne’ebe hanorin iha eskola tekniku vokasional sira.
Iha sorin seluk Diretor da Eskola Tekniku Vokasional Hotelaria no Turismo, Joanico da Costa hateten eskola refere loke ho tekniku vokasional hotelaria no turismo maibe professores ne’ebe hanorin ne’e maioria hanorin iha materia jeral deit.
“Ami iha professores espesifiku ba area hotelaria no turismo ne’e nain 9 deit, sira ne’e hanorin troka malu, ba materia espesifiku kona ba ba modul, ida ne’e seidauk sufsiente atu bele hanorin estudante husi primeiro ano to’o terseiro ano,” nia dehan.
Enkuanto total professores ne’ebe hanorin iha eskola tekniku vokasional ne’e hamutuk nain 29, husi ne’e nain sia maka hanorin iha material espesifiku, restu ne’e ajuda hanorin material baziku sira deit.
Iha parte seluk Diretor Jeral iha Ministerio Edukasaun Joventude no Desporto Antoninho Pires rekonese, katak durante ne’e seidauk iha formasaun espesifiku ruma ba professor sira ne’ebe hanorin iha eskola tekniku vokasional.
“Ami sei buka hela professor sira ne’ebe espesialista ba area tekniku vokasional nian hodi fo formasaun ba profesores ne’ebe hanorin iha tekniku vokasional, ida ne’e mak ami tenta hela,” nia hateten.
Dadaun ne’e, nia dehan prepara hela atu halo formasaun ba professores eskola tekniku vokasional sira, liu-liu depende ba area natureza eskola nian, hanesan tekniku, komersio ho hotelaria no turismo nian.
Nia dehan, iha tinan kotuk ne’e halo duni formasaun ba professores tekniku vokasional hamutuk 300 kona ba materia kurikular sira husi eskola ensino baziku to’o sekundario.