- Publika iha: 29 Abril 2013
Governu Japaun fo bolsu estudus ba Timor oan nain hat hodi ba eskola iha Japaun durante tinan lima nia laran.Timor oan nain hat ne’e kompostu husi membru Forsa Defeza Timor-Leste (F-FDTL) nain rua, nain ida husi Ministeriu Justisa no nain ida seluk husi Akademia husi Universidade Nasional Timor Lorosa’e (UNTL).
Sira nain hat ne’e sei ba hasai estudu iha Japaun kona ba area engenaria no academia defeza nasional.
Embaixador Japaun iha Timor-Leste, Yoshitaka Hanada esperansa katak, Timor nain hat ne’e bele utiliza oportunidade ne’e atu bele eskola ho diak.
“Hau fiar katak foinsae Timor oan nain hat ne’e nakonu ho esperansa no antuziastiku tebes atu ba no estuda iha Japaun,” dehan Embaixador Hanada, foin lalais, iha Embaixada Japaun, Pantai Kelapa, Dili.
Kona ba bolseirus nain rua ne’ebe foti iha area engenaria nian, nia esperansa katak, wainhira sira simu mestradu ho susesu, sira sei iha oportunidade atu kontinua ba eskola doutora nian.
“Ami iha timor oan nain 11 mak agora hala’o estudu iha univesidade sira iha Japaun inklui foinsa’e timor oan nain rua ne’ebe hamutuk ho ita ohin,” tenik Embaixador Hanada.
Iha fatin hanesan Vise Ministru Edukasaun ba Ensino Superior no Siensia, Marcal Avelino Ximenes fo agradese ba Governu Japaun ne’ebe fo ona oportunidade ba Timor oan nain hat ne’e hodi ba estudu iha Japaun.
Nia dehan, ida ne’e hanesan kontribuisaun governu Japaun ba governu Timor-Leste iha area rekursu humanu nian iha rai laran.
“Obrigadu ba Japanese sira tanba bele fo bolsu estudu ba timor aon nain hat, nain rua ba teknika no nain rua ba akademia,” agradese Vise Ministru Edukasaun ba Ensino Superior no Siensia Marcal Avelino Ximenes.
Nia rekonese katak, Governu Japaun durante ne’e fo ona ajudus barak mai nasaun Timor-Leste antes no depois de Timor hetan nia independensia.