- Publika iha: 29 Agosto 2023
Membru Parlamentu Nasionál, Deputadu António Verdial, konsidera tinan 18 resin implementasaun programa merenda eskolár la kontribui ba hadia nutrisaun labarik sira-nian, iha rai laran maibé lori moras ba labarik sira, tanba hahan ne’ebé fornese la iha valór nutrisaun no laiha ijiene.
Nia dehan iha tinan 2005, governu servisu hamutuk ho World Food Program (WFP), implementa programa merenda eskolár. Iha Tinan 2012, governu foti responsabilidade jere programa ne’e iha territóriu nasionál ho objetivu atu hamenus hamlaha, redús defisiénsia mikronutriente no anemia ba labarik sira no hasa’e taxa partisipasaun labarik iha aula-laran.
“Ita haree no akompaña iha tinan hira nia laran, implementasaun programa merenda eskolár iha Timor-Leste, kontinua nafatin laiha mudansa. Lahadia kualidade aihan ne’ebé oan sira konsumu no lahasa’e kuantidade mikronutriente ne’ebé oan sira presiza tebes,” nia hateten iha plenaria parlamentu.
Nia hateten Parlamentu Nasionál hasa’e ona orsamentu merenda eskolár husi $0,25 sentavus ba $0,42 sentavus kada estudante, maibé implementasaun labarik sira sei han etu mutin no han hahan sira importadu mak barak.
“Realidade, oan sira kontinua konsumu aihan ne’ebé kualidade ladun di’ak, liu-liu ona sira ne’ebé eskola iha munisípiu, área rurál no remota sira. Sira kontinua han etu mutin mak barak liu duke aihan mikronutriente sira. No fasilidade iha eskola sira hodi suporta programa merenda eskolár sei falta ho kondisaun ne’ebé la favorese, liu-liu laiha dapur própriu, armajen, sanitasaun, bee moos, no ekipamentu ba servidór sira atu uza,” nia hateten.
Entretantu, Deputadu Gabriel Soares hateten governu tenke fó atensaun no hadia implementasaun programa merenda eskolár atu atinji nia objetivu katak redús malnutrisaun ba labarik sira.
“Implementasaun la’o, maibé ijiene no ekipamentu sira hanesan dapur, bikan, kanuru presiza hare didi’ak fali atu kontribui hadia ita-nia oan sira-nia saúde. Nune’e sira bele akompaña aprendizajen ho di’ak liutan,” nia hateten.
Iha parte seluk, Ministru Administrasaun Estatal, Tomás do Rosário Cabral hateten governu da-sia ho apoia téknika husi Ajénsia World Food Program (WFP) sei tuun ba munisípiu atu haree no hadia kanál servisu ba implementasaun merenda escolar, tanba servisu ne’e entrega ona ba iha munisípiu sira.
Nia dehan orsamentu ba merenda eskolár ne’e, ki’ik liu millaun 1 dolares ba kada munisípiu ne’ebé benefisiáriu la barak. Iha Munisípiu balun inklui Díli, orsamentu millaun 3.
“Obrigasaun administradór munisípiu sira mak uza osan ne’e para povu, liu-liu labarik sira ba eskola ne’e bele iha nutrisaun di’ak atu bele eskola. Ne’e kontribuisaun estadu nian atu hadia nutrisaun labarik sira-nian,”nia hateten.
Nia rekoñese servisu monitorizasaun no kontrolu ba implementasaun programa merenda eskolár durante ne’e la másimu tanba ne’e governu sei eziji responsabilidade administradór no prezidente autoridade munisípiu sira atu mellora jestaun.