Liquisa: Mota ameasa sobu Eskola Laklo Ulo

Fiskalizasaun nebe mak Mem¬bru Parlamentu Komi¬saun G Deputado Mateus de Jesus halo ba hare’s situasaun relasiona ho Mota Liquisa nian, foin lalais (01/02), nota katak la’o to’o iha mota ulun eskola primaria ida neba, EP Laklo Ulo, hela deit metro ida mota atu sobu maske iha ekipamentus pezadus tolu para hadia didin protesaun ba eskola ne’e.

“Iha mota ulun besik foho hun neba do’ok husi estrada bot neba mak liga ba Maubara ninian, iha neba eskola ne’e maske ekipamentus bot tolu para hela iha Mota ulun neba, maibe eskola ne’e hela deit metro ida atu eskola sorin ba hotu ona,” hateten Deputadu de Jesus.

Tuir Deputadu de Jesus katak la’os eskola deit mota ameasa maibe kartoriu mestri sira nian mos kuaze mota atu lori hotu ona.
Deputado ne’e mos preokupa ho falta meza no kadeira ba estudantes 300 resin mak lor-loron marka presenza atu estuda iha eskola ne’e.

“Alunus iha 300 ital, mas kadeira ho meja iha uma laran ne’e  meja 50 depois kadeira 74 deit, oinsa mak atu bele fahe ba ema atus tolu ne’e,” hateten tan Deputado de Jesus.
Deputada Maria Exposto hateten katak fiskalizasaun nebe mak komisaun F halo seidauk to’o iha eskola neba maibe komisaun sei enkamina ba ministeriu kompetente atu hare ba problema ne’e.

“Kompetensia ba ami komisaun F nian. Komisaun F sei enkamina ba iha ministeriu kompetente  oinsa para bele buka medidas ruma para atu bele hadia,” Deputada Exposto relsa.
Nia hatutan tan katak fiskalizasaun nebe mak komisaun F halo iha teritorio laran tomak  konaba eskola meza kadeira la iha laos deit eskola Laklo-ulo maibe iha teritorio laran tomak kuaze problema hanesan.

“Laos dehan katak, frakeja mos husi komisaun F, frakeza husi ministeriu nebe relevante durante sira rasik halo buat hotu-hotu la tuir planu nebe mak sira prepara, tuir orsamentu nebe mak preve tiha ona iha parlamentu,I halo nia implementasaun la tuir planu nebe mak sira rasik trasa,” Deputada Exposto hato’o.

Problema ida ne’e problema tuan tiha ona no akontese iha tinan kotuk maibe tama iha 2012 eskola sira problema kontinua mosu inkondisoens fasilidades meza no kadeira eskola infrenta.
“Husi komisaun F nia fiskaijasaun dala barak ami hare parte barak, I balun at liu ne’e, balun to’o kondisoens eskola mos la diak.”
Deputada Maria Exposto dehan tan katak dala barak komisaun F hato’o ba Ministeriu Edukasaun iha paralamentu nasional maibe nia rezultado la iha.