- Publika iha: 31 Julho 2014
Sekretaria Estadu ba Promosaun Igualdade (SEPI), Idelta Maria Rodrigues, sei halo dialogu ho feto potensial sira husi 13 distritus hodi haree no rona direitamente sira nia preparasaun no hanoin ba iha eleisaun munisipiu ne’ebe sei mai.
Nia dehan, tuir planu dialogu ne’e sei hala’o iha fulan Juno to’o Setembru tinan 2014, SEPI hamutuk ho parseiru sira sei esforsu an fortifika no kapasita feto potensial sira atu bele prepara an iha eventu ne’e.
“Hau rasik mak sei halo dialogu ho feto sira iha distritu, hodi haree sira nia preparasaun no dificuldade ne’ebe sira hasoru,” SE Rodrigues hateten, iha salaun Maria Tapo Kaicoli, Dili.
Tanba ne’e, nia enkoraja nafatin feto maluk sira atu labele sente baruk fo hanoin no partisipa direita iha prosesu dezenvolvementu hotu ne’ebe oras ne’e dadaun la’o iha rai laran.
“Husu ba feto potensial sira atu labele baruk konkore iha posisaun hotu,”nia enkoraja.
SE mos, husu ba feto sira ne’ebe servisu iha nasional atu fila ba sira nia distritu hodi tuir kongresu nasional feto distrital ne’ebe sei realize iha distritus, hodi fo hanoin hamutuk kona ba feto nia kontribuisaun ba iha munisipiu.
Iha parte seluk Prezidente Grupu Feto Parlamentar (GMPTL), Deputada Josefa Alvares Pereira Soares, hateten supporta no enkoraja malu ne’e importante tebes, nune’e feto sira mos bele fiar an hodi lidera divizaun ruma iha linha ministerial.
Deputada ne’e hateten, feto iha nivel distrital mos barak mak iha kapasidade liu–liu nivel edukasaun ne’ebe as, maibe importante mak influensia ba ukun nain sira atu fo mos importansia ba feto atu lidera divizaun ruma.
“Feto sira iha kapasidade atu lidera diresaun ida, maibe problema mak ema ladun fo importansia ba partisipasaun feto iha kargu diretora no xefia,” nia hateten.