Sexta, Março 29, 2024
Total visitors: 766366

Grupu Feto Parlamentar Timor-Leste (GMPTL) konsidera Servisu Polisia Investigasaun Kriminal atu buka tuir autor soe bebe durante ne’e faila, tanba ate agora seidauk identifika suspeitu sira.

Membru GMPTL, Ilda Maria da Conceicao, hateten durante ne’e kazu infantisida akontese bebeik ona, iha tinan kotuk (2013) kazu infantisida hamutuk tolu, no iha 2014  ida, maibe to’o agora SIK seidauk hetan autor sira ne’e.

“Ita bele dehan faila, tanba kazu ne’e akuntese dala barak ona, maibe nein autor ida polisia hetan,” Deputada da Concensaun hateten, iha Parlamentu Nasional.

Tanba ne’e, nia sujere, ba governu atu hasa’e kapasitasaun membru polisia sira hodi nune’e bele profisional liu tan iha future.

“Haruka sira ba tuir formasaun iha Indonezia, tanba ita haree iha sira nia televizaun polisia Indonezia fasil teb-tebes hetan autor ba kazu sira hanesan ne’e,” Deputada  ne’e sujere.

Hatan ba preokupasaun ne’e, Komandante Ezersisiu, Inspektor Xefe Manuel Alves, rekonese katak to’o oras ne’e dadaun SIK seidauk hetan autor ba kazu infantisida ne’ebe akontese iha tinan kotuk (2013) no tinan ida ne’e (2014).

Nia hatutan, susar oituan ba SIK atu identifika autor ba kazu ne’e, tanba iha difikuldade lubuk ida mak sira infrenta.

“Laiha testamunha mak haree direitamente, depois pur ezemplu, inan ne’ebe soe oan ne’e hela iha Mandarin nia ba soe bebe ne’e iha Villa verde,” Xefe Alves hateten.

Alende ne’e , nia dehan, difikuldade seluk ne’ebe SIK hasoru mak iha bairo laran xeve suku la observa nia komunidade ne’ebe isin rua.

“Xeve suku tenke hatene mos iha bairu laran iha feto hira mak isin rua, atu nune’e kuandu hahoris no oan laiha, ne’e ita bele deskonfia, oan ne’e ba ne’ebe” Komandante ne’ e haktuir.

Maske nune’e, nia dehan, SIK nafatin la’o no neneik sei hetan autor hirak ne’ebe halo aktu refere.

Tan ne’e nia parte husu ba xeve suko sira no komunidade tomak, hodi kolabora ho SIK, nune’e bele fasil halo kapturasaun ba autor kazu infantisida.