- Publika iha: 22 Outubro 2014
Organizasaun Caucus feto iha politika ho Grupu Feto Parlamentar Timor –Leste (GMPTL) realize dialogu aberta ida ho estudantes sekundario iha Dili kona ba papel orgaun legislativu nian.
Prezidente GMPTL, Deputada Josefa Alvares Pereira Soares, hateten jovens nudar futuru ba nasaun nian, informasaun sira ne’e importante tebes ba sira atu komprende.
“Separasaun de poder no dever sidadaun ida nian hodi kontribui ba dezenvolvementu nasaun nian,” Deputada Soares hateten, iha Tower Fatuhada, Dili.
Tanba ne’e, nia mos husu ba joven sira, atu kapasita an, buka aprende barak liu tan, tanba oras ne’e dadaun estadu esforsu an fakar osan ba iha edukasaun atu prepara rekursu humanu ne’ebe kualidade iha futuru.
“Ita husu ita nia direitu barak liu, duke ita nia dever.Ita nia dever nudar sidadaun, nudar estudante ita nia dever mak estuda, kapasita an hodi servi tanba nasaun ne’e presiza jerasaun foun nia hanoin,” Deputada Soares hateten.
Entretantu estudante Armandina de Araujo, agradese no informasaun hirak ne’e ajuda tebes sira aumenta sira nia konesementu kona ba papel legislativu nian inklui partisipasaun feto iha politika.
“Ami nia agradese wain tebes ba iha organizasaun Caucus ne’ebe fo ona oportunidade ba ami tuir dialogu ida ne’e, agora ami hatene ona papel orgaun legislative no ezekutivu inklui mos sistema eleitoral iha ita nia rai,” estudante terseiro ano iha eskola Sekundario 04 Setembru, Balide, Dili ne’e dehan.
Estudante sira mos husu ba orgaun legislative sira atu halo fiskalizasaun ne’ebe rigorozu ba iha ezekusaun orsamentu Ministeriu Edukasaun nian, tanba eskola publiku sira kontinua laiha kondisoens.
Iha parte seluk, Koordenadora Programa Caucus, Paula Corte Real, hateten atividade dialogu ne’e sei hala’o mos iha distritu seluk, atu estudante sira iha konesementu ba papel orgaun legislative nian.
“Estudantes sira presiza hetan suporta husi entidade hotu atu ajuda, enkoraja sira hodi atinji sira nia vizaun ne’ebe iha, tanba agora iha tentasaun bar-barak liu-liu face book liu husi telephone, sira bele asesu buat oi-oin,” nia hateten.
Materia ne’ebe koalia iha dialogu ne’e, nia dehan, mak papel legislative nian, enkuadramentu legal haree liu ba iha direitu fundamental ne’ebe regula iha konstituisaun RDTL inklui mos sistema eleitoral iha Timor –Leste, tanba estudante sira ne’e maioria idade 17 ba leten.
Atividade dialogu ne’e hetan apoia finanseiru husi ajensia USAID Jakarta liu husi Kemitraan Jakarta ho montante $4.000 resin.