- Publika iha: 22 Outubro 2014
Organizasaun Fundasaun Alola (FA) konsidera Ministerio Edukasaun laiha seriadade atu kria politika ida atu reintegra labarik feto sira ne’ebe sai husi eskola, tanba isin rua atu fila ba eskola.
Diretora Ezekutivu FA, Alzira Reis, hateten politika ida ne’e importante tebes atu asegura labarik feto sira ne’e fila ba eskola, tanba iha konstituisaun RDTL garantia ema hotu iha direitu atu hetan edukasaun ne’ebe kualidade.
“Hau haree politika ida ne’e, sira koalia oral deit, lolos tenke secara tertulis no iha asinatura hodi sai hanesan baze legal ida atu la’o tuir,” Diretora Reis hateten.
Mesmu nia rekonese katak ida ne’e la’os fasil, maibe tenke iha hanoin no esforsu iha politika ida hodi sai matadalan ba eskola hotu atu simu labarik sira ne’e, tanba iha rekomendasaun konvensaun CEDAW mos husu governu atu dezenvolve politika ida ne’e.
Nia hatutan, FA iha ona mata dalan ida, atu halo advokasia iha nivel altu sira, fo mos importansia ba kestaun ida ne’e, tanba labarik feto sira mos iha direitu atu hetan edukasaun.
Entretantu Prezidente Grupu Feto Parlamentar Timor –Leste (GMPTL), Deputada Josefa Alvares Pereira Soares, politika ida ne’e diak tebes, ajuda labarik feto sira hodi asesu ba edukasaun formal, maibe presiza estuda klean hafoin foti desizaun.
“Tanba Timor nia mentalidade ne’e la suporta malu, bele mosu konsekuensia oi-oin ne’ebe afeta ba labarik sira ne’e nia psikologia,” nia dehan.
“Hau hanoin ita bele reintegra sira iha edukasaun informal, fo formasaun profesional ba sira ne’e, ne’e dalan ida ne’ebe diak ba ita atu halo oras ne’e dadaun,” nia dehan.
Iha parte seluk, Sekretaria Estadu ba Promosaun Igualdade (SEPI), Idelta Maria Rodrigues, hateten maske seidauk iha politika ida, maibe eskola balun simu ona labarik sira ne’e hodi asesu edukasuan formal.
“Iha eskola balun mak simu ona labarik sira ne’e iha prosesu aprendizajen,” SE Rodrigues hateten.