Prizaun Gleno Menus Guarda

Membru Parlamentu Nasional, Deputadu Paulino Monteiro husu ba Ministeriu Justisa atu halo rekrutamentu ba guarda prizaun Gleno, munisipiu Ermera nian, tanba dadaun ne’e prizaun Gleno falta guarda prizioneiru.

Tanba tuir nia, guarda prizioneiru iha prizaun Gleno agora iha deit nain 35, enkuantu prizioneiras iha nain 85.

“La sufsiente, ne’e sira atu atende hanusa, volume prizineiru barak maibe guarda prizasaun ho nominal ne’ebe ki’ik,presiza aumenta,” Deputadu Monteiro sujere, iha Parlamentu Nasional.

Tanba ne’e, nia husu ba Ministeriu Justisa atu halo rekrutamentu ba guarda prizional, tanba konsidera asuntu ne’e importante.

“Governu tenke toma responsabilidade ba ida ne’e,” nia dehan.

Nia mos husu, wainhira governu atu halo rekrutamentu foun ba guarda prizaun sira, tenke haree ba sira nia skill, atu nune’e bele garantidu nia profesionalidade servisu.

Iha fatin seluk Diretor Servisu Prizional no Reinsersaun Gleno, Nito dos Santos, rekonese iha prizaun Gleno falta duni guarda prizioneiru, maibe ida ne’e la fo impaktu ba sira nia servisu.

“Ida ne’e la prezudika ami nian servisu , servisu la’o nafatin,” Diretor Santos hateten, iha prizaun Gleno, Ermera.

Nia informa, gurda prizaun iha Gleno hamutuk 35, maibe nain rua ba halo hela estudu komparativu iha Indonezia no agora hela deit nain 33.

Hatan ba kestaun ne’e Ministru Justisa Ivo Valente,  rekonese situasaun hirak ne’e no sei trasa planu atu rezolve problema ne’e.

“Ita haree  planu ba oin,  ita sei aumenta,” Ministru Valente hateten.