- Publika iha: 19 Abril 2016
Tribunal Munisipal Dili hala’o julgamentu ba kazu violensia domestika ne’ebe involve arguida FM (fen) hurlele nia la’en ( LK) tanba fila uma ho kondisaun lanu no provoka arguida iha tempu kalan wainhira deskansa hela.
Iha tribunal arguida deklara katak nia halo asaun ne’e tanba wainhira vitima fila ba uma ho kondisaun lanu , la’os ba toba nonok, maibe halo fali barulhu hodi kanta no tebe sasan uma laran.
“Kalan bo’ot ema toba, nia lanu halo ribut vizinhu sira rona halo ita moe, tanba ne’e mak hau baku nia para halo nia nonok,” Arguida FM deklara, iha Tribunal Munisipal Dili.
Nia rekonese, katak iha tempu ne’eba uza duni paralon hodi baku nia la’en nia isin no konsege bubu duni, maibe la’os ho intensaun aat, maibe atu fo hanoin deit.
Maibe iha tempu ne’eba, vitima nia alin sente katak arguida atu oho vitima entaun nia halai ba kesar polisia.
Maibe durante prosesu justisa ne’e la’o hela, arguido no lezada diak malu ona no hela iha uma ida hodi haree oan nain tolu ne’ebe sira iha.
Iha fatin hanesan juis prezidente mos husu ba vitima atu fo nia deklarasaun ba tribunal, no iha altura ne’eba vitima hili koalia hodi rekonese katak nia sala duni tanba fila ho kondisaun lanu no tebe sasan uma laran aat.
“Ne’e hau sala tanba fila ho lanu no halo barulhu,” vitima rekonese aan.
Nia mos rekonese, katak arguida feto ne’ebe diak wainhira nia fila ho kondisaun lanu, dala barak arguida sempre pasensia, maibe karik iha momentu ne’eba demais liu ona, tanba ne’e arguida halo aktu ne’e.
Ho hahalok ne’ebe mak arguida halo ne’e Ministeriu Publiku akuza arguida ho krimi ofensa ba integridade fizika simples ho artigu 145 no forma violensia domestika artigu 2 kodigu prosesu penal.
Hafoin rona tiha deklarasaun husi arguida no lezada, juis prezidente fo pena administrasaun ba arguida.