- Publika iha: 24 Janeiro 2017
Arguido basa lezada nia hasan dala rua inklui tuku iha kotuk laran dala ida, tanba deit lezada la halo matabixu ba nia.
Tuir akuzasaun Ministeriu Publiku (MP) ne’ebe lee sai husi juis prezidente, katak iha loron 8/07/2015, tuku hitu dadersan, lezada homan hela bote no haluha tiha prepara matabisu ba arguido no oan sira.
Entaun ho hirus, arguido soe sasan iha dapur laran hodi hakilar lezada no iha momentu ne’eba lezada hatan didiak deit, maibe wainhira lezada ba besik, arguido basa kedas dala rua iha hasan no tuku kotuk laran dala ida no halo lezada sente oin halai.
Tanba konsidera hahalok ida ne’e krime, entaun lezada nia alin ba hato’o keixa iha polisia.
Hafoin lee akuzaun hirak ne’e, arguido sente akuzaun ne’e balun los no balun la loos, entaun arguido uza nia direitu hodi koalia ba tribunal katak, iha altura ne’eba arguido bolu lezada mai dapur, e lezada sei koalia hasoru arguido no hasai liafuan mal edukadu ba arguido no to’o temi arguido nia inan aman.
Entaun arguido nervozu hodi baku tiha lezada.“Sela’e hau la baku nia, maibe nia tolok fali hau ne’e, entaun hau baku atu eduka nia,” nia deklara iha audiensia julgamentu, iha Tribunal Munisipal Dili (TMD).
Hafoin rona tiha deklarasaun husi arguido, juis prezident tama kedas iha alegasaun Ministeriu Publiku ne’ebe husu ba tribunal atu fo pena fulan tolu prizaun no suspende ba tinan ida, tanba arguido kontra ona artigu 145 kodigu penal kona ba ofensas integridade fizika simples ho forma violensia domestika.
Enkuantu husi parte defeza husu ba tribunal atu fo pena administrasaun, tanba arguido foin mak komete krime dala ida no konfensa ona atu iha future la repete tan aktu hanesan.
Entretantu juis prezidente fo pena fulan neen prizaun no suspende ba tinan ida ba arguido.