SEM Fo Formasaun Ba Membrus Polisia Feto

Sekretariadu Estadu Apoiu Promosaun Sosio Economica Mulheres (SEM) oferese formasaun ba membrus polisia feminina kona ba lideransa no koalia iha publiku (public speaking).

Xefe Departamentu Formasaun SEM, Filomena Martins, hateten objetivu principal husi formasaun ne’e atu hasa’e kapasidade polisia feminina sira kona ba oinsa foti desizasaun wainhira assume kargu bo’ot ruma iha instituisaun nia laran.

Alende ne’e, nia dehan SEM mos fo material balun kona ba public speaking nian ne’ebe sei foka liu kona ba oinsa feto ida bele koalia ho fiar aan no struktural iha diskusaun ruma. 

“Formasaun ne’e importante tebes ba sira, tanba sira balun agora kaer hela kargu komandante, entaun sira presiza formasaun sira hanesan ne’e,” Martins hateten.

Nia rekonese, katak iha instituisaun PNTL defisil ba feto atu foti desizaun tanba servisu bazea ba hirarkia, maibe instituisaun mos presiza konsidera desizaun balun ne’ebe komandante feto sira foti.

Formasaun ne’e SEM koopera hamutuk ho UN Women, sociadade civil ne’ebe durante ne’e halo advokasia kona ba asuntu feto nian.

Nia hatutan, treinamentu ne’e sei hala’o durante semana ida no partisipante sira mai husi eskuadra polisia husi munisipiu 13.

Nia informa, treinamentu hanesan sei halo mos ba F-FDTL feminina, atu nune’e sira bele informadu diak liu kona ba asuntu hirak ne’e.

Iha parte seluk Komandante Eskuadra Pante Makasar, regiaun Oe-Cusse Inspector Polisia Adelaide de Rosa sente orgulhu tanba ho formasaun ida ne’e sira bele hatene maneiras saida mak sira presiza halo hodi foti desizaun ruma.

Alende ne’e, nia dehan oinsa mak bele koalia ho kualidade no diak iha forum ruma ou lidera diskusaun ida.

“Ami bele hetan benefisiu husi treinamentu ida ne’e, hau sei habelar tan informasaun sira ne’e ba feto maluk sira seluk ne’ebe mak la marka prezensa iha fatin ne’e,” nia promete.