Sexta, Março 29, 2024
Total visitors: 766366

Kazu violensia domestika inklui ofensas integridade fizika simples registu 116 iha Servisu Investigasaun Kriminal (SIK) munisipiu Ainaro durante tinan 2016.

SIK munisipiu Ainaro registu aas kazu kazu violensia domestika durante tinan 2016.

Komandante Polisia Eskuadra munisipiu Ainaro, Superintendente Justino Menezes, hateten kazu rua ne’e domina tanba komunidade sei menus informasaun kona ba lei violensia domestika no lei krimi nian.

“Ami sei esforsu hodi bele hamenus numeru kazu rua ne’e iha baze,” nia hateten.

Nia hateten, presiza haforsa liu tan programa vizita suku ba suku ne’ebe implementa husi polisiamentu komunitaria sira iha baze ba futuru.

Nia hatutan, sira sei vizita uma ba uma komunidades no hanesan meius ida oinsa mak bele kria relasaun diak ho sira inklui mos ho entidades estadu nian.

Alende ne’e, nia dehan sira mos sei introduce kona ba lei balun ne’ebe relasiona ho kazu krimi ne’ebe konsagra ona iha artigu kodigu penal.

Husi kazu krimi 116 ne’e, nia hateten kazu ofensas integridade fizika simples hamutuk 48 no VD iha 42 kazus.

Iha parte seluk Membru Parlamentar (MP) Albina Marcal, hateten kazu violensia domestika no kazu krimi simples la’os deit iha Ainaro, maibe domina iha timor.

Tanba ne’e, nia dehan presiza halo sosializasuan kona ba lei inklui fo formasaun kona ba konsiensia no oinsa maneja emosaun liu-liu ba kaben nain sira.

“Entidade hotu-hotu presiza servisu hamutuk fo hanoin malu hodi hakribi aktu violensia hotu,” nia hateten.

Nia rekonese, governu halo esforsu lubuk ida hodi halo prevensaun ba krimi, maibe presiza mos konsiensia husi komunidade sira.