- Publika iha: 22 Novembro 2017
Membru Parlamentu Nasional, Maria Angelina Sarmento husu governu atu kontinua fo apoiu fundus ki’ik ba iha feto servisu seksu komersial (prostituisaun) sira, hahu halo negosio hodi sustenta sira nia familia duke halo servisu seksu.
Nia hateten, servisu ida ne’e hahu ona iha governu anterior ne’ebe konsege fo ona apoiu ba ema nain 100 ne’ebe involve iha vida prostituisaun, tanba problema ekonomia hodi hahu halo atividade negosio ki’ik hodi hetan rendimentu lor-loron.
“Osan ne’e atu insentiva inan feto sira ne’ebe halo servisu seksu (prostituisaun), atu dezenvolve negosio ki’ik ajuda sustenta sira nia familia, duke sira sakrifika sira nia aan ba halo atividade sira ne’e,” nia hateten iha Hotel Vila Verde, Dili.
Nia hateten, feto sira ne’ebe involve iha servisu seksu ne’e la’os deit mai husi klase ki’ik, maibe sira ne’ebe iha osan, tanba mudansa vida moris ne’ebe hakarak tuir modernizasaun ohin loron nian.
Alende ne’e, iha balun tanba hetan violasaun seksual iha uma laran, entaun ikus mai sira deside involve iha servisu ida ne’e hodi hetan osan, tanba konsidera sira laiha valor ona.
Iha parte seluk, Xefe Suku Kampung Alor Alcina de Carvalho dos Santos hateten Timor –Leste hanesan nasaun ida husi nasaun seluk iha mundu ne’ebe vida moris karun tebes no oportunidade servisu limitado, entaun ema barak hili vida ida ne’e hodi sustenta sira nia moris.
Alende vida moris karun, nia mos dehan sosiedade nia intrepretasaun kona ba demokrasia sala, tanba barak mak la hatene ona sira nia dever hanesan sidadaun ida hodi kontrui ba dezenvolvimentu nasaun nian.
“Hau halo kontrolu ne’ebe maximu ba joven sira iha suku laran no hau haree ema nia oan hanesan mos hau nia oan, tanba sira mak futuru nasaun nian,” nia hateten.
“Kalan tuku 7 to’o 11, hau kontrola joven sira labele tur iha estrada ibun, ba inan-aman sira ne’ebe la simu asaun ida ne’e, hau pronto atu responde tanba hau lakohi sira monu ba ransu livre.”
Tanba ne’e, nia husu ba governu liu –liu instituisaun kompetente sira atu halo kontrolu ne’ebe maximu ba folin sasan iha merkadu no kontrola atividade negosio sira iha rai laran atu labele afeta ba ema nia vida.