Benefisiario Bolsa da Mae Tuir Formasaun Jestaun Negosio

Benefisiario programa bolsa da mae nain 30 husi suku Saburai, postu administrativu Maliana, munisipio Bobonaro tuir formasaun kona ba jestaun negosio ne’ebe oferese husi organizasaun Movimentu Feto Foinsa’e (MOFFE) durante loron tolu.

Diretora MOFFE, Yasinta Lujina hateten objetivu husi programa ne’e mak atu hasa’e kapasidade inan feto sira nian hodi dezenvolve negosio, nune’e bele iha sustentabilidade, tanba subsidio ne’e sei hapara bainhira benefisiario sira atinji ona idade 17 anos.
Nia dehan, ho programa ida ne’e bele asegura inan sira iha kbi’it natoon hodi haruka oan sira hasai edukasaun iha nivel ne’ebe aas no evita problema social sira hanesan droga, prostituisaun no seluk tan.
“Ita hanoin, katak ho tulun ida ne’e bele apoia inan sira sustenta sira nia oan nia eskola iha futuru no oan sira bele asesu ba edukasaun ba nivel ne’ebe aas,” nia hateten iha servisu fatin Farol, Dili.
Nia hateten, inan feto sira sei aprende kona ba lideransa ekonomia, jestaun negosio, finansiamentu liu –liu dezenvolvimentu negosio ne’ebe diak.
Nia dehan, programa ne’ebe hanesan sei implementa mos iha munisipio Covalima suku Lalaua, ho partisipante nain 30 no husi Regiaun Administrativa Espesial Oe-Cusse suku Abani grupo alvu nain 30.
Depois hetan formasaun no estabelese grupo kada aldeia, nia hateten sira mos fo apoia fundus ho montante $500 kada grupo hodi hahu atividade negosio besik sira nia hela fatin.
Nia dehan, programa hakbi’it feto ne’e hetan apoiu finanseiru husi Ministerio Solidaridade Sosial (MSS) ho montante $20,934.00 durante fulan neen implementasaun.
Enkuantu, iha tinan 2008 governu deside implementa programa bolsa da mae, ho objetivu tulun familia kbi’it la’ek sira nia oan atu asesu ba edukasaun, ne’ebe hahu ho pilotu. Iha tinan 2012 governu hasai dekretu lei numero 18/2012 kona ba extensaun programa ida ba teritorio tomak, tanba numeru benefisiario komesa aumenta maka’as.
Iha parte seluk, Diretor Nasional Asistensia Sosial MSS, Mateus da Silva hateten total uma kain 51.759 mak simu subsidio bolsa da mae. Kada uma kain benefisiario (labarik) nain tolu ba kraik.
Nia dehan, ema ne’ebe iha direitu hetan bolsa da mae mak inan sira ne’ebe sai xefe familia (solteira, faluk), maibe oan barak entaun subsidio ne’e bele ajuda hodi responde ba labarik sira nia nesesidade eskola nian.
“Ita sei halo estudu impaktu subsidio bolsa da mae ne’e ba familia, liu –liu labarik hira mak konsege remata eskola no hetan susesu,” nia hateten.
Nia hatutan, oras ne’e dadaun ministerio halo hela re-ajustamentu dadus bolsa da mae atu bele hatene tuir dadus lolos benefisiario sira, tanba iha balun idade liu ona `tinan 17, la eskola ona, mate ona tenke hasai husi lista.
Nia dehan, tinan ida ne’e ministerio hahu halo registu ba benefisiario foun sira, maibe pagamentu sei halo iha tinan 2018.
Nia informa, total orsamentu ba programa bolsa da mae iha tinan ida ne’e hamutuk 9.900,000 no pagamentu hala’o tinan ida dala ida deit tanba menus rekursu humanus atu hala’o servisu ida ne’e.