Caucus Halo Avaliasaun Ba Servisu Xefe Suku Feto

Organizasaun Caucus “Feto iha Politika” organiza dialogu ho xefe suku feto 21 iha Timor –Leste, hodi fahe esperiensia kona ba programas no dezafiu durante hala’o mandatu tinan ida.

Diretora Caucus, Paula Corte Real hateten dialogu ne’e hanesan enkontru primeiru ho xefe suku sira hafoin kaer knar.
Nia dehan, organizasaun feto sira iha responsabilidade atu organiza sorumutu hodi avalia servisu ne’ebe lideransa feto sira halo iha tinan ida nia laran, liu –liu programa no dezafiu sira.
“Avaliasaun ida ne’e mak atu hamosu mekanismu trabalho balun hodi reforsa sira nia papel, hanesan xefe suku hodi hala’o sira nia kompetensia hanesan lideransa komunitaria transformative,” nia hateten.
Nia dehan, iha preokupasaun barak ne’ebe xefe suku sira levanta hanesan komunidade sira seidauk asesu ba iha eletrisidade.
“Ami sujere atu sira (xefe suku) kolabora ho governu hodi responde ba iha iha preokupasaun sira ne’e,” nia sujere.
Alende ne’e, nia dehan iha sorumutu ne’e sei kria programa uniforma ida atu oferese ba iha 21 xefe suku, tetu hodi implementa iha suku laran.
Nia hateten, programa sira ne’e mak hanesan halo advokasia ba governu iha munisipio atu haree asuntu saude reprodutiva e seksual, kampanha prevensaun isin rua sedu liu –liu servisu hamutuk ho igreja, familia atu fo konselho ba joven sira labele monu ba hahalok risku hirak ne’ebe estraga sira nia futuru.
Entretantu, Xefe Suku Sau postu administrativu Manatuto Vila, munisipio Manatuto Barbara Gama Soares agradese ba iha organizasaun Caucus ne’ebe sempre fo akompania sira hahu husi inisio to’o agora.
Nudar lideransa feto, nia sempre hasoru dezafiu barak liu –liu lahetan apoiu ne’ebe maximu husi mane maluk sira, tanba realidade mane balun lakohi simu feto sai xefe suku.
“Hau sempre esforsu aan nafatin atu hatudu ba mane sira atu loron ruma sira bele simu feto hanesan sira nia parseiru,” nia hateten.
Nia hateten, durante mandatu tinan ida hamutuk ho governu konsege identifika ona familia vulneravel 60 ne’ebe hetan ona apoiu fos husi governu no tuir planu sei rekolha tan dadus foun. Tanba familia vulneravel barak tebes.
Nia hatutan, atividade seluk mak kolabora ho governu atu identifika no fo apoiu ba familia ne’ebe hetan dezastre.