Segunda, Fevereiro 19, 2018
Total visitors: 196285

Prezidente Rede Feto Timor –Leste, Judite Ximenes hateten problema rekursu humanu no finanseira sai obstaklu bo’ot ba iha organizasaun Rede Feto atu halo atividade advokasia no promosaun ba direitu feto nian.

Rede Feto konsidera fator finanseira sai empedementu ba servisu advokasia no promosaun direitu feto nian durante ne’e.

Nia dehan, Rede Feto iha membrus organizasaun hamutuk 32, maibe 21 mak ativu enkuantu seluk la ativu ona, tanba problema finanseiru atu apoia implementasaun atividade iha terenu.
“Ami laiha orsamentu (subsidio) permanente husi governu hanesan organizasaun Cruz Vermelha no Conselho Joventude Timor –Leste (CNJTL) ne’ebe governu tau,” nia hateten, iha reflesaun natal hamutuk iha salaun Maria Gorette Kaikoli, Dili.
Nia dehan, sira (RF) halo ona aprosimasaun ba governu atual atu konsidera mos preokupasaun ida ne’e hodi ajuda servisu operasional sekretariadu nian.
Nia hateten, organizasaun membru sira ne’e hala’o servisu advokasia ba promosaun direitu feto iha setor hotu hanesan politika, ekonomia, edukasaun, agrikultor no seluk tan.
Nia informa, iha tempu badak Rede Feto sei organiza kongressu Nasional Feto nian ne’ebe sei hamosu plataforma ida, ne’ebe koalia feto nia involvementu iha prosesu dezenvolvimentu nasional iha setor hotu.
Iha parte seluk, Sekretaria Estado Igualidade Jeneru e Inkluzaun Sosial (SEIJIS), Laura Menezes Lopes hateten governu iha komitmentu atu servisu hamutuk ho organizasaun feto sira hodi promove direitu feto sira nian.
Nia dehan, estado halo ona nia obrigasaun liu husi kria lei, politika no adopta ona konvensaun internasional sira ne’ebe koalia kona ba direitu feto nian, maibe atu tau politika sira ne’e iha realidade, entidade hotu iha papel importante liu –liu organizasaun feto sira.
“Ami sei kontinua halo advokasia hodi hametin instituisaun estado sira bele konsidera nafatin prinsipio igualidade jeneru iha programas no orsamentu,” nia hateten.
Nia dehan, SEIJI nia papel principal mak halo advokasia iha nivel alto atu konsidera asuntu igualidade jeneru iha politika nasional sira no hakbi’it ekonomia grupo vulneravel sira.
Nia dehan, hahu husi governu anterior Sekretariadu ida ne’e fo apoia ona fundus ba iha grupo feto atus resin iha teritorio tomak hodi hahu halo atividade negosio, maibe iha balun deit mak susesu.
“Governu iha komitmentu nafatin atu kontinua formasaun, atu hadia diak liu tan sira nia jestaun atu sai susesu iha futuru,” nia hateten.
Nia hateten, governu liu husi fundu transferensia sei kontinua fo apoiu no hakbi’it grupo feto sira iha lideransa no jestaun negosio nian.

E-mail Subscription

Enter your email address:

    Poll

    Nothing found!

    Follow us on Twitter