- Publika iha: 20 Fevereiro 2018
Eleitores feto sira husu ba lider Partido Politiku sira atu garantia situasaun paz no estabilidade durante prosesu elisaun antisipada nian la’o to’o elisaun remata, hodi asegura feto sira nia partisipasaun iha loron elisaun mai.
Prezidente Asosiasaun Feto Munisipio Aileu, Cristinha da Conçeicão hateten feto sira nia hakarak mak elisaun ne’e hala’o ho paz no hakmatek, atu sira livre ba ezerse sira nia direitu politiku iha loron elisaun.
Nia hateten, povu iha direitu atu fo nia legitimidade ba ukun liu husi elisaun e elisaun ida ne’e importante tebes ba povu hodi deside futuru nasaun ida nian.
“Husu ba politiku nain sira, maske ideologia no prinsipio ne’e ida-idak nian, maibe objetivu ida deit katak hakarak liberta povu husi mukit no kiak,” nia hateten via telefone.
Nia dehan, feto barak mak sei ba fo sira nia votu ho esperansa ida, katak partidu ne’ebe manan maioria tenke ukun ho fuan, laran moos, domin no tuir lei hodi garantia paz no estabilidade atu feto sira halao servisu ho hakmatek hodi fo sustentabilidade ba familia ida-ida.
Entretantu, Xefe Suku Soba, Postu administrative Laga, Munisipio Baucua, Francisca Monica sente triste ho elisaun antisipada ne’ebe sei hala’o iha fulan Maiu ne’e, tanba iha Konstituisaun RDTL la hakerek kona ba elisaun antisipada.
Tinan tolu tuir malu (2016-2018), tuir nia dezenvolvimentu iha rai laran ladun la’o ho diak tanba orsamentu barak liu hodi realiza elisaun sira hanesan elisaun xefe do suku (2016), elisaun presidensial, elisaun parlamentar iha tinan kotuk (2017) no agora elisaun antisipada.
“Ami sente triste tanba dezenvolvimentu durante tinan hirak ne’e la’o ladun diak, agora orsamentu dua desimu ne’e sei labele kobre ou halo dezenvolvimentu to’o tinan 2019,” nia hateten.
Nia mos preokupa ho situasaun ne’ebe akontese iha rai laran, povu balun komesa trata lider nasional sira iha media social tanba ne’e lider nasional sira tenke kria ambiente ne’ebe paz atu evita violensia.
Nia hateten, povu rural sira nia hakarak, lider nasional sira tenke hamutuk hodi mobilize povu hodi partisipa iha prosesu ida ne’e, hodi deside dezenvolvimentu ba iha rai ida ne’e no moris diak povu nian.