Prezensa La’en Importante Bainhira Fen Partus

Prezensa la’en importante tebes bainhira fen ida atu partus, nune’e bele enkoraja nia kaben atu hasoru situasaun ne’ebe defisil ho kalma no hakmatek.

“La’en nudar primeira pesoa iha fen nia sorin bainhira fen partus, tanba ita nia la’en hatene no konese liu ita duke inan ka banin ka kuinhada sira,” hateten Sekretaria Estadu Promosaun Igualidade (SEPI), Idelta Maria Rodrigues, bainhira sai orador iha dialogu social entre sosiedade sivil ho governu kona ba domestic worker, iha Hotel Timor, Dili.
Tanba domin mak hola malu no to’o ikus iha oan, tanba ne’e domin ida ne’e tenke hatudu nafatin entre fen ho la’en, liu-liu iha tempu defisil hanesan atu partus.
Alende ne’e, ho prezensa la’en bele enkoraja inklui sira mos bele asiste direitamente feto nia terus bainhira atu partus oan ida.

“Lori mate mak sosa ita nia oan nia moris, kuandu kuinhada mak hein dalaruma sira trata fali ita, ne’ebe diak liu la’en mak hein,” SE Rodrigues tenik.

Kona ba regulamentu parte ospital nian ne’ebe la fo autorizasaun ba la’en sira atu labele tama akompanha nia fen partus, SE Rodrigues dehan presiza hare kestaun ne’e.

“Hau nia esperiensia, bainhira hau partus parteira sira la haruka hau nia kaben tama, ho razaun dehan mane labele tama, maibe hau dehan la’e hau nia la’en tenke besik hau nune’e bele enkoraja hau hodi hasoru situasaun ida ne’e,” SE Rodrigues dehan tan.

Entretantu Liaison Officer iha Fundasaun Alola, Jacinta da Cruz konkorda ho ideas ida ne’e, nune’e la’en mos bele sente sofrementu ne’ebe fen sira sente bainhira atu partus.

“Domin la’os deit iha momentu prosesu halo oan maibe tenke hatudu akompanha fen to’o tur ahi, tanba oan ne’e it’rua nia oan, ne’ebe la’en tenke iha ita nia sorin,” hateten Liaison Officer da Cruz.

Inan husi oan nain tolu ne’ebe nia kaben sempre akompanha nia bainhira atu partus, husu ba la’en ka aman sira hotu ne’ebe durante ne’e ladun fo importansia ba nia fen, liu-liu iha tempu tur ahi, nune’e fen sira bele laran metin no prontu atu hasoru situasaun ida ne’e.