Meza Parlamentu Mane Domina, SEPI Triste

Diferente iha segundu lejislatura, iha ne’ebe Vise Prezidente Parlamentu Nasional iha feto, maibe iha terseira lejislatura mane mak domina, e situasaun ida ne’e halo Sekretaria Estadu Promosaun e Igualidade (SEPI), SE Idelta Maria Rodrigues deskontente.

“Hau espera katak  ita esforsu an nafatin no bei-beik  hatudu nafatin ba publiku katak feto mos bele tur iha pozisaun saida deit, tanba ne’e presiza hadia an, prepara an diak liu tan tanba  la’os sira iha ne’e (deputadas) labele maibe desizaun politika koligasaun tau ona mane,  e labele laran taridu demais tanba sei iha oportunidade luan ba feto sira atu konkore,”

dehan SE, Idelta Maria Rodrigues, (30/07), hafoin partisipa serimonia tomada de pose ba membru parlamentu foun, iha Uma Fukun, Dili.

Tanba ne’e nia husu ba feto politika sira atu labele tur nonok no hein deit tanba feto labele tur iha pozisaun Vise Prezidente, maibe esforsu an nafatin buka frakeza ne’ebe feto iha hodi impede ba tur iha posisaun ne’ebe as tanba desizaun ne’e hanesan refleksaun ida ba feto sira atu refleta no buka tuir.

Sekretaria Estadu mos rekomenda ba Parlamentu foun atu bele kolabora ho membru re eleitu sira atu bele hatudu  servisu ne’ebe diak hodi hatutan lian povu nian ne’ebe fo benefisio  ba ema hotu.

Iha oportunidade hanesan  eis Vise Prezidente PN, Maria Paixão, dehan involvementu feto iha meja parlamentu liu-liu pozisaun Vise Prezidente PN ne’e importante tebes, tanba posisaun ida ne’e hanesan xavi atu foti  desizaun ruma  e “labele haluhan tau mos afavor ba feto se laiha feto ne’e difisil tebes atu foti desizaun ruma favorese ba feto Timor.”

“Hau hare katak ladun favorese ba feto maluk sira, la’os mane sira labele fo liafuan murak maibe mane sira la moris hanesan feto, la terus hanesan feto no la sente iha sira nia kulit difikuldade ne’ebe feto sente tanba ne’e diak liu Vise Prezidente ne’e feto para bele ajuda prezidente foti desizaun iha Parlamentu ida ne’e bele favorese ba feto Timor, liu-liu orsamentu jeral do estadu,” preokupa eis Vise Prezidente PN ne’e.

Paixao mos husu ba Grupu Feto Parlamentar Timor-Leste (GMPTL) sira  kontinua no tenke forte, unidu no servisu maka’as atu defende feto maluk sira nia interese no direitu ba oin tanba “imi mak nudar reprezentante feto iha Parlamentu,” Paixao esperansa.