SPDL Distritu Oe-Cusse Rejistu Kazu Violasaun 8

Servisu Protesaun Direitu Labarik (SPDL) iha Diresaun Reinsersaun Sosial Regional Oe-Cusse konsege rejistu kazu violasaun direitu labarik hamutuk neen (6), e kazu hirak ne’e submete ona ba iha Ministeriu Publiku (MP) hodi halo akuzasaun.

“Iha semester daruak tinan ne’e ami konsege simu kazu kontra direitu labarik hamutuk neen e iha mos kazu tolu mai husi tinan 2011 agora kontinua la’o ba prosesu legal nian,” hateten Ofisial SPDL Diresaun Reinsersaun Sosial Regional Oe-Cusse, David Casenube, hafoin partisipa iha kosultasaun sistema protesaun labarik, (02/08),iha Salaun Enkontru ETPA Santa Rosa, Distritu Oe-Cusse.
Kazu neen ne’e mak hanesan kazu abandonadu, separadu, adopsaun husi ema internasional, no kazu violasaun hasoru labarik, e autor ba kazu sira ne’e agora sei livre hela, tanba evidensia la forte bainhira halo julgamentu iha tribunal.

“Iha 2008 no 2010 konsege lori autor nain rua ba kadeia,” Ofisial SPDL Oe-cusse ne’e dehan.

Entretantu partisipante Afonso Caunan Colo, ne’ebe partisipa iha konsultasaun ne’e, sujere ba ministeriu relavante atu aselera esbosu lei justisa juvenil nune’e bele asegura direitu labarik ho diak.

“Lei ne’e mak nudar baze legal ida, e ita keta hare deit ba konvensaun direitu labarik ka Konstituisaun RDTL artigu 18, ida ne’e diak maibe presiza lei espesiffiku ida,” sujere Partisipante Colo.